Անվտանգութեան Խորհուրդի նիստին խօսելով՝ ռուսական դիւանագիտութեան ղեկավարը նախազգուշացուց Սուրիոյ դէմ որեւէ յարձակում կատարելէ, ինչ ալ ըլլայ դրդապատճառը:

Չորեքշաբթի երեկոյեան Ռուսաստանի արտաքին գործոց նախարար Սերգէյ Լաւրովը ելոյթ ունեցաւ Անվտանգութեան Խորհուրդի նիստին, զոր կը վարէր ԱՄՆ-ի նախագահ Դոնալդ Թրամփը:

Անդրադառնալով միջուկային համաձայնագիրին մասին Թրամփի ելոյթին՝ Լաւրովն յայտարարեց.

«ԱՄՆ-ի դուրս գալը Իրանի միջուկային ծրագիրին շուրջ Ժընեւեան համաձայնագիրէն՝ մեծ վտանգ կը սպառնայ երկիր մոլորակի վրայ միջուկային զէնքը չտարածելու կանխադրոյթին, եւ կը խաթարէ քիմիական զէնքի տարածման կանխարգիլումը»։

Ան նաեւ վերահաստատեց Ռուսաստանի աջակցութիւնը՝ Իրանի միջուկային ծրագիրին վերաբերող 2015 թ.-ի համաձայնագիրին:

 

Անոր խօսքերով, Ուաշինգտոնը մէկ կամ միւս ձեւով արգելք կը հանդիսանայ` Միջին Արեւելքը  միջուկային զէնքերէ զինաթափելու որեւէ համաձայնութեան:

Անվտանգութեան խորհուրդի նիստին, Ռուսիոյ դիւանագիտութեան ղեկավարը նախազգուշացուց Սուրիոյ վրայ որեւէ յարձակում կատարելէ՝ ինչ ալ ըլլայ դրդապատճառը:

 

«Ահաբեկիչները նոյնիսկ սորված են, թէ ինչպէս պէտք է քիմիական զէնք պատրաստեն Սուրիոյ մէջ», – աւելցուց ան: