Թիւրքիոյ նախագահ Ռեջէպ Թայիպ Էրդողանը Գերմանիա այցին ժամանակ պէտք է պատրաստուի սառն ընդունելութեան: Ասոր մասին CNN-ի կայքին գրած է Chatham House-ի թրքագէտ Ֆադի Հակուրան:

Անոր խօսքով` եղածն անցեալին թողնելու եւ ամէն ինչ նոր սկսելու մասին Էրդողանի յոյսերը՝ ամենայն հաւանականութեամբ յօդս կը ցնդին:

Փորձագէտը նաեւ նշած է, որ շարք մը գերմանացիներ Էրդողանին կը մեղադրեն ժամանակին միջոցներ չձեռնարկելուն համար եւ 2015թ.-ին Սուրիոյ փախստականներուն մեծ հոսքը չկանգնեցնելուն մէջ: Յունական մամուլը յայտնած էր, որ ան սպառնացած է 2015թ.-ին  Եւրոպան փախստականներով հեղեղել, եթէ իրեն չօգնեն փախստականներու ճգնաժամը լուծելու:

Հեղինակին կարծիքով, ճիշտ այս պատճառով ալ Գերմանիոյ ծայրահեղ աջակողմեան հակաիսլամական «Այլընտրանք Գերմանիոյ համար» կուսակցութեան համար ճանապարհ բացուեցաւ, եւ վերջինը 2017 թուականին յայտնուեցաւ Բունդեսթագին մէջ: Գերմանիոյ թիւրքերը եւս բացարձակ տեսանկիւն չունին Էրդողանի մասին: Ըստ որոշ լրագրողներու` Էրդողանի գալը պէտք է որ ուղղեկցուի երկրով մէկ  շարք մը ցոյցերով:

Մինչդեռ թրքագէտը կը կարծէ, որ Գերմանիոյ պաշտօնեաները պէտք է գիտակցին, որ Էրդողանին հետ կապերը միանշանակ խզելը՝ Գերմանիոյ շահերէն չի բխիր: Թրքագէտին կարծիքով` գերմանացիները չեն կրնար մոռնալ Գերմանիոյ հանդէպ Էրդողանի անբարեացակամ վերաբերմունքը, ինչպէս նաեւ ձերբակալուած գերմանացիներու մէկ մասին ազատ չարձակելը: Էրդողանն ալ իր հերթին  դառնացած է 2016 թուականին իրեն դէմ կատարուած յեղաշրջման փորձին հանդէպ Գերմանիոյ անտարբեր վերաբերմունքէն:

Թրքագէտը գրած է, թէ Թիւրքիոյ մէջ կ՛ողջունէին անցեալ տարի Գերմանիոյ հասցէին Էրդողանի հրապարակաւ հնչեցուցած սպառնալիքները: Սակայն ան օր մը պիտի զղջայ, որ այդպէս վատաբանած է երկիր մը, որմէ այդքան շատ  կախուած է: