Տաջիկիստանի մայրաքաղաք Դուշանբէի մէջ Հայաստանի Հանրապետութեան վարչապետ Նիկոլ Փաշինեանը եւ Ատրբէյջանի նախագահ Իլհամ Ալիեւը ոչ պաշտօնական խօսակցութիւն ունեցած են, որուն ընթացքին ձեռք բերած են պայմանաւորուածութիւններ Լեռնային Ղարաբաղի հակամարտութեան կարգաւորման վերաբերեալ։ Ասոր մասին այսօր՝ Սեպտեմբերի 28–ին, Տաջիկիստանի մայրաքաղաք Դուշանբէյէն վերադառնալէն ետք ըսած է Հայաստանի Հանրապետութեան վարչապետ Նիկոլ Փաշինեանը՝ ֆեսյբուքեան ուղիղ եթերով։

Վարչապետի խօսքով՝ իրենց առաջին, ոչ պաշտօնական խօսակցութեան ընթացքին առարկայական զրոյց եղած է, որու արդիւնքով երկու երկիրներու ղեկավարները պայմանաւորուած են իրենց պաշտպանութեան նախարարներուն յանձնարարական տալ՝ յստակ քայլեր ձեռնարկելու սահմանագիծի լարումն իջեցնելու, սահմանային միջադէպերը կանխելու համար:

«Ես այս պայմանաւորվածութեան մասին անմիջապէս տեղեակ պահած եմ Արցախի նախագահ Բակօ Սահակեանին, եւ այս պայմանաւորուածութիւնը անոր համար նոյնպէս ընդունելի եղած է։ Ըստ էութեան, կրնանք ըսել, թէ Ղարաբաղ–Ատրբէյջան շփման գիծի ողջ երկայնքով միջոցներ պիտի ձեռնարկուին հրադադարի խախտման դէպքերը կանխելու ուղղութեամբ»,– ըսած է Փաշինեանը՝ ընդգծելով, որ նախորդ օրը երեկոյեան արդէն համապատասխան հրամանը տուած է մեր զինուած ուժերուն։

«Ուրախ եմ արձանագրելու, որ իմ վարչապետ ընտրուելէս ետք այս վերջին գիշերն եղաւ  ամենախաղաղ գիշերը ինծի համար, եւ յուսով եմ, որ այն տրամանաբանութիւնը, որ վերջին շրջանին կը գործէր, ու ցաւօք զոհեր կ՛ունենայինք եւ կորուստներ հայկական եւ ատրբէյջանական կողմերուն՝ կը դադարի»,– ըսած է Փաշինեանը։

Երկու երկիրներու ղեկավարները նաեւ պայմանաւորուած են ստեղծելու շտապ գործող կապի համակարգ։