Նադիա Մուրադը նոբելեան մրցանակի դափնեկիր

25-ամեայ եզդի Նադիա Մուրադը սարսափելի փորձութիւններ վերապրած է Իրաքի մէջ Իսլամական Պետութիւն կոչուող ահաբեկիչներուն մօտ գերի իյնալով: Այնուամենայնիւ, այս փխրուն աղջիկը չէ կոտրուած եւ որոշած է իր կեանքը նուիրել արմատական մարդասպաններու ձեռքին յայտնուած կանանց եւ աղջիկներու փրկութեան պայքարին:

Աղջիկը քանի մը ամիս մնացեր է այսպէս կոչուած Իսլամական Պետութեան զինեալներուն մօտ՝ քանի մը տասնեակ այլ գերի կանանց եւ աղջիկներու  հետ: Սարսափելի տանջանքներու, ծեծի եւ բռնաբարութեան մէջով անցնելով՝ որոշ ժամանակ անց անոր յաջողուած է փախչիլ, եւ ան սկսած է աշխարհին պատմել Իսլամալամ Պետութեան զինեալներու վայրագութիւններուն մասին:

«Հայերը լաւ կը հասկնան եզդիներուն, քանի որ անոնք ալ նման ցաւ վերապրած են», – 2016 թուականի Ապրիլին Երեւանի մէջ «Ցեղասպանութեան յանցագործութեան դէմ» երկրորդ համաշխարհային համաժողովին մասնակցելու ատեն լրագրողներուն ըսած էր Նադիան:

«Ահաբեկիչները մինչեւ օրս կը սպաննեն եզդի տղամարդկանց, գերի կը վերցնեն կանանց: Մպտ 10 հազար եզդիներ գերեւարուած են եւ սպաննուած, սակայն մինչեւ օրս միջազգային կառոյցները լուրջ քայլեր չեն ձեռնարկեր անոնց փրկութեան համար», – պատմած է Նադիա Մուրադը, որ հրաշքով փրկուելէ ետք եզդիական ճամբարէն մեկներ է Գերմանիա:

Անցեալ տարի Մուրադը աշխարհին կոչ ըրած էր ճանաչելու Հայոց դէմ կատարուած ցեղասպանութիւնը: «Ես կը միանամ հայ ժողովրդին՝ Հայոց դէմ կատարուած ցեղասպանութեան 103-րդ տարելիցին, եւ բոլոր երկիրներուն կոչ կ՛ընեմ ճանաչելու այդ ցեղասպանութիւնը», – Twitter-ում գրած է ան: