Չինաստանի Ժողովրդական Հանրապետութեան պաշտօնական ներկայացուցիչ Խուա Չունյինը «զզուելի» որակեր է Թիւրքիոյ արտգործնախարարութեան խօսնակի յայտարարութիւնները Չինաստանի տարածքին ապրող ույղուրական համայնքի ներկայացուցիչներու «համակեդրոնացման ճամբարներուն» մասին, կը գրէ «ՌԻԱ Նովոստի» գործակալութիւնը:

Նշենք, որ Թիւրքիոյ արտգործնախարարի խօսնակ Համի Աքսոյը, մեկնաբանելով Չինաստանի մէջ ստեղծուած որոշ ճամբարները, որտեղ կը պահուին մեծ թիւով ույղուրներ, ատոնք որակեր էր «համակեդրոնացման ճամբարներ»: Թիւրքիան պահանջեր էր փակել թիւրքական ծագումով ույղուրներու այդ ճամբարները:

Աքսոյն ընդգծեր էր, որ ճամբարներու փակման պահանջը իրենք նորէն բարձրացուցեր են անկէ ետք, երբ անոնցմէ մէկուն մէջ սպաննուեր էր ազգութեամբ ույղուր յայտնի աշուղ Աբդուրեհիմ Հեիթը։

Չինաստանէն ոչ միայն հերքեր են այս լուրը, այլեւ անհեթեթ համարեր են ներկայացուած մեղադրանքները:

«Մենք ուշադրութիւն դարձուցինք Թիւրքիոյ արտգործնախարարի պաշտօնական ներկայացուցիչի յայտարարութիւններուն, ատոնք ծայրայեղ զզուելի են»,- ըսեր է Խուա Չունյինը:

Չինական կողմը նաեւ ներկայացուցեր է տեսանիւթեր, որոնցմով կ՛ապացուցուի, որ ույղուր աշուղը ողջ է:

Բացի անկէ, Չինաստանի մէջ ընդգծեր են, որ վերոնշեալ ճամբարները բնաւ «համակեդրոնացման ճամբարներ» չեն եւ իրականութեան մէջ կը նպաստեն, որ որոշ ույղուրներ հեռու մնան ահաբեկչութենէ եւ ներգրաւուին հասարակութեան շարքերը: