Հայաստանի եւ Երեւանի պետական կամերային երգչախումբերը հանդէս պիտի գան մեծ համերգներով՝ նուիրուած Կոմիտասի 150-ամեակին: «Արմենպրես»-ի մամուլի սրահէն ներս հրաւիրուած ասուլիսին Սենեկային երաժշտութեան ազգային կեդրոնի տնօրէն Նորայր Նազարեանը նշեց, որ ընդհանուր միջոցառումներու մեկնարկը պիտի տրուի Փետրուարի 20-ին:
«Հետաքրքիր ու կարեւոր նախաձեռնութեամբ հանդէս կուգանք: Կոմիտասի 150-ամեակի միջոցառումներու շրջանակէն ներս Սենեկային երաժշտութեան ազգային կեդրոնը հանդէս կուգայ համերգաշարով: Հայաստանի պետական սենեկային երգչախումբը Փետրուարի 20-ին՝ ժամը 19:00-ին, Կոմիտասի անուան սենեկային երաժշտութեան տան մէջ հանդէս կուգայ համերգով, ինչով ալ կը տրուի ընդհանուր միջոցառումներու մեկնարկը»,- ըսաւ Նորայր Նազարեանը:
Համերգը պիտի կրէ «Կոմիտաս-150» խորագիրը:
Հայաստանի պետական սենեկային երգչախումբի գեղարուեստական ղեկավար եւ գլխաւոր դիրիժոր Ռոբերտ Մլքէյեանը նշեց, որ համերգին երգչախումբը Կոմիտասին պիտի ներկայացնէ երեք հիմնական ժանրերով՝ խմբերգեր, դաշնամուրային մանրանուագներ, մեներգեր:
Երեւանի պետական սենեկային երգչախումբը, գեղարուեստական ղեկավար եւ գլխավոր դիրիժոր Յարութիւն Թոփիկեանի գլխաւորութեամբ, հանդթս պիտի գայ քանի մը համերգով: «Կոմիտասը եւ մենք» խորագիրով համերգաշարի մեկնարկը պիտի տրուի Փետրուարի 27-ին Կոմիտասի անեւան սենեկային երաժշտութեան տան սրահին մէջ:
Կոմիտաս վարդապետի ծննդեան 150-ամեայ յոբելեանը ընդգրկուած է ՅՈՒՆԵՍԿՕ-ի Հռչակաւոր մարդկանց եւ կարեւոր իրադարձութիւններու 2018-2019 թուականներու օրացոյցին: