Արամ Խաչատրեանի ժառանգութիւնը ամբողջ աշխարհով ճանաչելի դարձնելու նպատակով 15 տարի շարունակ կոմպոզիտորի ծննդեան օրը` Յունիսի 6-ին, Երեւանի մէջ կը մեկնարկէ անոր անուան միջազգային երաժշտական մրցոյթը, որուն այս տարի պիտի մասնակցի երեսուն երաժիշտ, տասնեւերկու երկիրէ:

Մրցոյթին, որ տեղի կ՛նենայ մինչեւ Յունիսի 14-ը, Խաչատրեանի եւ այլ ստեղծագործողներու գործերը պիտի ներկայացնեն դաշնակահարները: Ընտրուեր է 30 մասնակից:

«Ընդգրկուեր են Չինաստանէն, Հայաստանէն, Ռուսաստանէն, Ուկրանիայէն, ԱՄՆ-էն, Հիւսիսային Կորիայէն, Թայլանդէն եւ այլ երկիրներէ երաժիշտներ, որոնք կը ներկայացնեն տարբեր կատարողական դպրոցներ: Մրցոյթին նպատակը Խաչատրեանի ստեղծագործութիւնները հանրահռչակելն է»,-ըսեր է փառատօնի կազմկոմիտէի ղեկավարը։

Ինչպէս նախորդ, այնպէս ալ այս տարի, մրցոյթը կը կատարուի երեք փուլով: