Իտալական RaiNews յառաջատար լրատուամիջոցն անդրադարձեր է Հայաստանէն ներս տեղեկատուական տեքնոլոգիաներու ոլորտի զարգացումներուն՝ «Կովկասի սիլիկոնեան հովիտը» վերնագիրով հրապարակուած յօդուածով: «Արմենպրես»-ի փոխանցմամբ՝ լրագրող Մարտինօ Սենիգան շրջեր է Հայաստանի մէջ տեղակայուած ՏՏ ոլորտի յառաջատար ընկերութիւններով եւ ներկայացուցեր է անոնց նորամուծութիւնները:

«Հայաստանի մայրաքաղաք Երեւանի մէջ այսօր ծաղկում կ՛ապրին բազմաթիւ ստարտափներ եւ ընկերութիւններ, որոնցմէ շատերը կը հանդիսանան իրենց ոլորտի համաշխարհային յառաջատարներէն: Այդ պատճառով ալ Հոկտեմբերի 6-էն 9-ն Երեւանի մէջ կը կայացուի WCIT 2019 տեղեկատուական տեքնոլոգիաներու համաշխարհային համաժողովը»,- նշեր է լրագրողը:

Լրագրողը զրուցեր է ՀՀ արտաքին գործոց նախարար Զօհրապ Մնացականեանին հետ, այցելեր է WCIT 2019 համաժողովի գրասենեակ, Վանաձորի տեքնոլոգիական կեդրոն, Renderforest ընկերութեան գրասենեակ, Արմաթ տարրալուծարան, COAF Smart կեդրոն եւ  զրուցեր է անոնց աշխատակիցներուն հետ:

Սենիգան իր յօդուածով պատմական ակնարկ իրականացուցեր է նաեւ Հայաստանի մասին, ու ներկայացուցեր է հայկական մշակոյթը: