Արեւմտեան Հայաստան – Ըստ Հասանքէյֆի համակարգման զեկոյցին՝ Ըլլըսու ամբարտակին պատճառով յառաջացող ոչնչացումներուն հետեւանքով 100 հազար մարդ պէտք է տարհանուի:

12 հազար տարուայ պատմութիւն ունեցող Հասանքէյֆը՝ իր տարածքին գտնուող Տիգրիսի հովիտով միասին, կանգնած է 50 տարուայ տնտեսական կեանք խոստացող Ըլլըսու ջրամբարի ջրերուն տակ յայտնուելու վտանգին առջեւ:

Ջրապահպանական պետական տնտեսութիւնը (DSI), Յուլիսի 18-ին փակելով ամբարտակի փականները՝ սկսեր է ջուրի ամբարման ու պահպանման աշխատանքը:

Բաթմանի «Նահանգապետն» ալ յայտարարեր է, որ հնագոյն Հասանքէյֆ քաղաքը Հոկտեմբեր 8-էն պիտի փակուի երթեւեկութեան առջեւ եւ պիտի շրջափակուի «անվտանգութեան» օղակով։

Մինչ կ՛ընթանայ Հասանքէյֆի անհետացման դէմ պայքարը՝ Հասանքէյֆի Համակարգման կեդրոնը պատրաստեր է 54-էջնոց զեկոյց մը, որպէսզի ուշադրութիւն հրաւիրէ ամբարտակի պատճառելիք վնասներուն:

Ըստ Մեթին Յոքսունի տեղեկատւութեան՝ զեկոյցով կը նշուի, որ միջազգային կառոյցներն ու կազմակերպութիւնները արձագանքեր են Ըլլըսուի ամբարտակի հասցնելիք վնասներուն՝ բնութեանն ու պատմութեան:

Ամբարտակը ամբողջովին լեցուելու պարագային՝ ջրամբարի մէջ կը ներառնուի Տիգրիս գետի 136 կիլոմետրնոց ջրային պաշարը, հետեւաբար ամբարտակի ջուրերը կուլ կուտան 400 կիլոմետրնոց Տիգրիսին՝ իր վտակներուն հետ միասին։

Զեկոյցը նաեւ ուշադրութիւն հրաւիրեր է գաղթին եւ գործազրկութեան, այն բանէն ետք՝ երբ Ըլլըսուի ամբարտակը կը հեղեղէ Հասանքէյֆը։ Իսկ “Ըլլըսու ծրագիրի” ընկերային ծախսերը անպատասխանատու կերպով կը պարտադրուին քաղաքապետարաններուն: Զեկոյցով կը նշուի, որ 90-ականներուն ուժով տեղահանուած հարիւր հազարաւոր մարդիկ՝ ովքեր տեղաւորուեր էին Դիարբեքիրի եւ Բաթմանի շրջանի քաղաքներուն մէջ, անոնց խնդիրները մինչ այժմ առհասարակ լուծուած չեն, իսկ գաղթի նոր ալիքը ալ աւելի պիտի դժուարացնէ քաղաքներու կեանքը:

Զեկոյցը կոչ կ՛ընէ նաեւ դադարեցնելու նախագիծը. «Ըլլըսուի ամբարտակի նախագիծը պէտք է հնարաւորին չափ շուտ պէտէ դադրեցուի, եւ պէտք է մշակուին լուծումներ՝ ընկերային-տնտեսական չափանիշները բարձրացնելու, մշակութային եւ բնական հարստութիւնը պաշտպանելու համար»: