Արեւմտեան հայաստանի Բիւրակնի շրջանին մէջ կատարուած հնագիտական պեղումներով գտնուեր են 3 հազար տարուայ հնութեամբ ցորենի հատիկներ։

Ըստ աղբիւրի՝ Բիւրակնի(Բինգէօլի) Սոլհան գաւառի Մուրադ գիւղին մէջ գտնուող Նորիկ անուամբ հողաբլուրին վրայ դեռ անցեալ տարուանէ մեկնարկած պեղումները կը շարունակուին։

Խարբերդի թանգարանի տնօրէն Զիյա Քըլըչի ղեկավարած պեղումներուն կը մասնակցին 158 հոգինոց խումբ մը, որ գտեր է Վանի թագաւորութեան եւ բիւզանդական ժամանակաշրջաններուն պատկանող բազմաթիւ իրեր, որոնց շարքին՝ 3 հազարամեայ հնութիւն ունեցող ցորենի հատիկներ։

Ցորենի տեսակը որոշելու նպատակով՝ անոնք պիտի ուղարկուին ԱՄՆ-ի մէջ գտնուող փորձագիտարան մը։

Յիշեցնենք, որ երկու տարի տեւած սոյն պեղումներուն ընթացքին յայտնաբերուեր է 3․600 տարուայ վաղեմութիւն ունեցող Վանի թագաւորութեան շրջանի բնակավայր մը, ինչպէս նաեւ՝ բիւզանդական դարաշրջանի բազմաթիւ գտածոներ։