Իրանի դէմ ԱՄՆ-ի տնտեսական ահաբեկչութիւնը յաւերժ չի տեւեր, – ըսեր է երկրի նախագահ Հասան Ռոհանին՝ ընդգծելով, որ բոլոր երկրները կը ձգտին բարեկամական կապեր պահպանելու իսլամական հանրապետութեան հետ:

Անոր խօսքով՝ Կուալա Լումպուրի գագաթնաժողովը լաւ հնարաւորութիւն է համաշխարհային առաջնորդներուն համար՝ լուծելու տարածաշրջանային եւ միջազգային խնդիրները։ «Մենք կը կարծենք, որ տարածաշրջանային խնդիրներու լուծման միակ միջոցը բանակցութիւններն են»,- ընդգծեր է ան։

Այս միջոցառման, որ տեղի պիտի ունենայ Դեկտեմբերի 18-էն 21-ը, պիտի մասնակցին 400 միջազգային գործիչներ, որոնց շարքին՝ 250 համաշխարհային առաջնորդներ եւ քաղաքական գործիչներ 52 երկիրներէ։

Մասնակիցները պէտք է քննարկեն մահմետական աշխարհի ամենակարեւոր խնդիրները։

Այնուհետեւ Ռոհանին պիտի մեկնի Տոկիօ՝ բանակցելու Ճապոնի վարչապետ Սինձո Աբէի հետ։