Դերսիմի մէջ սուրբ համարուող լեռնային այծերը կը շարունակուին սպաննուիլ: Անցեալ շաբաթավերջին Պուլումուր գաւառի Քոջաթեփէ (Aşgirek) գիւղին տարածքին որսագողերուն կողմէ սպաննուեցաւ երկու լեռնային այծ, որմէ ետք այսօր եւս սպաննուեր  է մէկը, նոյն գաւառի Կոզլուջա գիւղի շրջանին:

Գիւղացիները կ՛ըսեն, որ լեռնային այծերը տարածաշրջանէն ներս կը համարուին սրբազան, եւ իրենք կը պահանջեն ընդհանրապէս արգիլել լեռնային այծերուն որսը՝ օրինական կամ անօրինական ձեւով:

Երբ Պուլումուրի գաւառի Կոզլուջա գիւղի մօտակայքին պաշտպանութեան տակ գտնուող լեռնային այծը սպաննուեցաւ որսագողերու կողմէ՝ հետաքննութիւն սկսեցաւ:

Փաստաբանները, բնապահպան գործիչներն ու դերսիմցիները քրէական գործ յարուցեր են կանգնեցնելու համար որսորդութեան անուան տակ կատարուող կենդանիներուն կոտորածը։