ԿԻԼԻԿԻԱ – Իդլիբի շրջանին մարտավարական զէնքերը գործածութեան մէջ մտեր են. Ըստ «Al-Masdar News»-ի, «Տոչկա» մարտավարական հրթիռները այժմ կը թիրախաւորեն ահաբեկիչներուն դիրքերը:

Ռուս-սուրիական օդային հարուածները եղանակային պայմաններուն պատճառով որոշակիօրէն յետաձգուեր են, որմէ օգտուեր են ահաբեկչական խմբաւորումները եւ անցեր են հակայարձակման՝ Սուրիական բանակին դէմ։ Սակայն ստացեր են հուժկու պատասխան՝ Tochka ռազմավարական հրթիռային համակարգերէն։ Շաբաթ օրը «Հայ՛աթ Թահիր ալ- Շամ»-ի (HTS) ահաբեկիչներն սկսեր են իրենց հզօր հակահարուածը Իդլիբ նահանգի հարաւ-արեւելքին գտնուող Սուրիական ուժերուն դէմ. իրենց հերթին Սուրական ուժերը Տոչկա հրթիռներուն օգնութեամբ կը շարունակեն յառաջ ընթանալ դէպի Ջարջանազ:

Հակառակ անոր, որ Սուրիական զօրքերու յառաջխաղացումով՝ քանի մը օր անց  հաւանաբար կը փակուի երկրորդ թրքական անցակէտը, Թիւրքիոյ պաշտպանութեան նախարարը շաբաթ օրը յայտարարեր է, որ Թիւրքիան «երբէք պիտի չհեռանայ այն տասներկու անցակէտերէն, զորոնք կը զբաղեցնէ Իդլիբի մէջ»:

Թիւրքիան հակուած է նոր մեծ պատերազմ սկսելու Լիբիոյ մէջ: Ան սկսեր է հոն ուղարկել Իդլիբի ահաբեկիչները: Դիտորդները չեն բացառեր Սուրիական բանակի եւ թրքական բանակի առճակատման հնարաւորութիւնը:

Իսկ երկրի հիւսիս-արեւելքին ԱՄՆ-Սուրիա բախումները կը բազմապատկուին: Օրերս Al-Masdar News-ը հաղորդեր է Ամերիկայի եւ Ռուսաստանի զինուած ուժերուն միջեւ առաջին բախման մասին Հասաքէ նահանգի արուարձաններու տարածքին: Դեկտեմբերի 25-ին Թալ Թամր քաղաքին մէջ առաջին բախումը սկսեցաւ այն բանէն ետք, երբ ամերիկեան ռազմական զօրախումբը փորձեր էր տեղեկութիւններ հաւաքել շրջանի բնակիչներէն, ինչին արձագանքեցին ռուսական ուժերը, – կը նշէ զեկոյցը: Սուրիական հակամարտութեան սկսելէն ի վեր սա առաջին անգամն է, որ ամերիկեան եւ ռուսական ուժերը իրարու դէմ ռազմական գործողութիւններ ծաւալեր են: