Հայաստանի պետական սիմֆոնիկ նուագախումբը 2020 թուականը կը սկսի Եւրոպական համերգային շրջագայութեամբ։ Նուագախումբը՝ գեղարուեստական ղեկավար եւ գլխաւոր դիրիժոր Սերգէյ Սմբատեանի ղեկավարութեամբ, Յունուարի 8-էն 21-ը ելոյթներ կ՛ունենայ Եւրոպայի 5 երկրի՝ Գերմանիոյ, Մեծ Բրիտանիոյ, Աւստրիոյ, Չեխիոյ եւ Ռուսաստանի համերգասրահներուն մէջ։ Դասական երաժշտութեան ութ համերգները կը կայանան՝ Յունուարի 8-ին Միւնխենի մէջ, Յունուարի 9-ին՝ Զալցբուրգի մէջ, Յունուարի 10-ին՝ Շտուտգարդի մէջ, Յունուարի 12-ին՝ Բեռլինի մէջ։ Յունուարի 14-ին Հայաստանի պետական սիմֆոնիկ նուագախումբը բեմ կը բարձրանայ Լոնդոնի «Բարբիկան» կեդրոնին, Յունուարի 17-ին՝ Վիեննայի «Միւզիքվերէյն»-ի մէջ, Յունուարի 19-ին՝ Պրահայի «Ռուդոլֆին»-ի մէջ եւ Յունուարի 21-ին՝ Մոսկուայի «Զարյադիէ» դահլիճին մէջ։ Ասոր մասին «Արմենպրես»-ին տեղեկացուցին Հայաստանի պետական սիմֆոնիկ նուագախումբէն։