Դոնի Ռոստովի մէջ կը ստեղծուի խորհրդային դիւցազնական հետախոյզ Գեւորգ Վարդանեանի թանգարանը։

NEWS.am-ի փոխանցմամբ` Ռոստովի մէջ Հայաստանի գլխաւոր հիւպատոսութեան մամուլի ծառայութիւնը տեղեկացուցեր է, որ թանգարանի կառուցման համար յատկացուեր է հողակտոր՝ քաղաքի կեդրոնին։

Գեւորգ Վարդանեանը ծնած է Ռոստովի մէջ եւ քաղաքի պատուաւոր քաղաքացի է, քաղաքը կ՛անուանեն՝ Ռուսաստանի հարաւային մայրաքաղաք։ 2012 թուականին Գեւորգ Վարդանեանի անունով Ռոստովի «Աստղերու պողոտային» վրայ՝ անուանական աստղ տեղադրուեցաւ։

Խորհրդային Միութեան հերոս Գեւորգ Վարդանեանը ԽՍՀՄ ամենայայտնի հետախոյզներէն էր։ 1943 թուականին ան անօրինականներու խումբին մէջ էր, որոնք կանխեցին նացիստական Գերմանիոյ հետախուզութեան մահափորձը Ստալինի, Չերչիլի եւ Ռուզվելտի դէմ Թեհրանոի մէջ՝ հակահիտլերեան դաշնութեան ղեկավարներու հանդիպման ժամանակ։