Կ․Պոլսոյ քաղաքապետարանն Ապրիլի 23-ին ազգային ինքնիշխանութեան ու երեխաներու տօնին առթով օգնութեան փաթեթներ  բաժներ էր  քաղաքի բնակիչներուն։ Այդ փաթեթներուն մէջ եղեր է նաեւ գրքոյկ մը, որու էջերէն մէկուն մէջ առկայ լուսանկարին պատկերուեր են իրար կողքի նստած մուսուլման, քրիստոնեայ, ալեւի ու հրեայ հոգեւորականներ։ 

Քննարկման առարկայ դարձած լուսանկարին համար Թիւրքիոյ նախագահ Ռեջեպ Թայիպ Էրդողանը քննադատեր է քաղաքապետարանին, զոր կը ղեկավարէ ընդդիմադիր «Ժողովրդահանրապետական» կուսակցութեան ներկայացուցիչ Էքրեմ Իմամօղլուն։

Էրդողանին  վրդովեցուցեր է, այն հանգամանքը, որ ալեւիականութիւնը ներկայացուեր է որպէս իսլամէն առանձին, ինքնուրոյն կրօն։ 

«Ես յատկապէս ժողովուրդի ներկայութեամբ  կը ցանկանամ յայտարարել, որ կը նզովեմ, կը դատապարեմ ալեւիականութիւնը որպէս կրօն ներկայացնելու այդ մօտեցումը, ինչը կայ անոնց բաժնած գրքոյկին մէջ»,- ըսեր է Էրդողանը կառավարութեան նիստէն ետք ։

Նշենք, որ ալեւիներու դաւանած ալեւիականութիւնը Թիւրքիոյ մէջ պետութեան կողմէ չ’ընդունուիր որպէս առանձին կրօն, այլ կը  ներկայացուի սուննի իսլամի հետ միասին։ Սակայն ալեւիներն իրենք, զիրենք  կը համարեն առանձին կրօնական ուղղութեան ներկայացուցիչներ, չեն ընդունիր իրենց նոյնացումը իսլամի հետ եւ  չեն աղօթեր մզկիթներու մէջ։