«Ազնավուր» հիմնադրամի եւ վերջինիս գործընկերներու միջոցով Ֆրանսիայի եւ Շուեյցարիայի մէջ հաւաքուեր է աւելի քան 35 տոննա մարդասիրական օգնութիւն՝ Հայաստան ուղարկելու համար: «Արմենպրես»-ի հաղորդմամբ, «Ազնավուր» հիմնադրամը կը տեղեկացնէ, որ այս օգնութեան մէկ մասը կուղարկուի Նոյեմբերի 27-ին՝ Ֆրանսիայի կառավարութեան վարձակալած ինքնաթիռով՝ որպէս Ֆրանսիայի նախագահ Էմանուել Մակրոնի յայտարարած մարդասիրական աջակցութեան մաս:

«Հայաստանը միշտ  առանձնահատուկ տեղ  զբաղեցուցերէ Շառլ Ազնավուրի սիրտին: Ան դարձեր է Գիւմրիի մէջ երկրաշարժը վերապրածներու խորհրդանիշը՝ մշտապէս ըլլալով հայ ժողովուրդի կողքին, թէ՛ ամենաերջանիկ, թէ՛ տխուր պահերուն: «Ազնավուր» հիմնադրամը կը շարունակէ կեանքի կոչել արտիստի մարդասիրական առաքելութիւնն ու տեսլականը. մենք նոյնպէս այս դժուար ժամանակներուն կանգնած ենք հայ ժողովուրդի կողքին»,- նշեր է «Ազնավուր» հիմնադրամի համահիմնադիր, հոգաբարձուներու խորհուրդի նախագահ Նիկոլայ Ազնավուրը։