Արցախի Քաշաթաղի շրջանի Աղաւնոյ գիւղին մէջ այսօր 80 մարդ կամ 25 ընտանիք կը բնակուի։ 38 ընտանիք լքեր է գիւղը պատերազմական օրերուն ու դեռ չեն վերադարձած։ Աղաւնոյի գիւղապետ Անդրանիկ Չավուշեանը մտահոգութիւն յայտած է գիւղի մէջ նոր վերանորոգուած ու առանց ուսուցիչ մնացած դպրոցի եւ Քաշաթաղի 3 բնակավայրերու վերաբնակեցման հարցերու շուրջ։

«Հստակ պետութեան կողմէ պէտք է պաշտօնական յայտարարութիւն ըլլայ։ Եթէ կ՛ըսենք` Սուսը, Աղաւնոն, Բերձորը  կը մնայ, ոչ թէ ձեւական պիտի ըսենք, այլ այնպէս պէտք է աշխատինք, որ մարդիկ վերադառնան», – կ՛ըսէ ան։

Պատերազմէն ետք Ատրպէյճանի տիրապետութեան տակ անցեր է Արցախի Քաշաթաղի շրջանի գրեթէ ողջ տարածքը՝ բացառութեամբ 3 բնակավայրերու՝ շրջկենտրոն Բերձոր քաղաքի, հարակից Ներքին Սուս եւ Աղաւնոյ գիւղերու, բայց անոնց կարգավիճակը դեռ հստակ չէ։ 

Քաշաթաղի անյայտ կարգավիճակով 3 համայնքներու բնակիչները որոշումին կըսպասեն. յոյսը միայն այս պահին պետութեան կողմէ աջակցութիւնն է, վաղուայ օրն ու կատարելիքն անյայտ է։