Հայաստանը The Heritage Foundation-ի տնտեսական ազատութեան 2021 թուականի համաթիւին երկու հորիզոնականով բարելաւեր է դիրքերը։ Ինչպէս  կը փոխանցէ «Արմենփրես»-ը, առաւելագոյն 100 միաւորէն անցնող տարին Հայաստանը 71,9 միաւոր հաւաքեր է՝ դասուելով «հիմնականը ազատ» տնտեսութիւն ունեցող երկիրներու շարքին։ Հայաստանը 178 երկիրներէն 32-րդ հորիզոնականին է՝ նախորդ տարուայ ինդեքսին երկիրը կը զբաղեցնէր 34-րդ տեղը։ 2018 եւ 2019 թուականներուն Հայաստանը համապատասխանաբար 44-րդ եւ 47-րդ հորիզոնականներուն էր։

2021 թուականի զեկոյցը կը հրապարակուի Covid-19 համավարակի տարածման պայմաններուն համաշխարհային տնտեսութեան համար ծանր ժամանակներուն: «Կորոնավիրուսի համավարակին հակազդելուն զուգահեռ՝ տնտեսական ազատութիւնն առաւել կարեւոր կ՛ըլլայ քան երբեւէ», – կ՛ըսուի զեկոյցին մէջ։

Հարաւային Կովկասի մէջ, ըստ ինդեքսի, տնտեսական ազատութեան ամենաբարձր ցուցանիշը գրանցեր է Վրաստանը՝ 77,2 միաւորով կը զբաղեցնէ 12-րդ հորիզոնականը։ Ատրպէյջանը 38-րդ տեղն է։

Ուաշինգտոնի մէջ հիմնուած հեղինակաւոր The Heritage Foundation-ը Միացեալ Նահանգներու հանրային քաղաքականութեան ազդեցիկ կառոյցներէն կը  համարուի։