Վարդուհի Վարդերեսեանը ծնած է 1928 թուականի Մարտ 19-ին, Ռոմանիոյ մայրաքաղաք Բուխարեստի մէջ։ Դերասան, թատերագէտ Գեւորգ Աբաջեանի կինն է։ 1946 թուականին տեղափոխուեր է Հայաստան։ Առաջին բեմելը եղած է Նուբարաշէնի ինքնագործ թատրոնին մէջ։ 1947 թուականին ընդունուեր է Լենինականի դրամատիկական թատրոնին կից ստուդիա եւ նոյն թուականէն խաղցեր է թատրոնի բեմին։ 1958 թուականէն տեղափոխուեր է Երեւանի Սունդուկեանի անուան թատրոն։ Կերտեր է բազմաթիւ դերեր թատրոնէն ներս՝ Շիրուանզադէի «Պատուի համար»՝ որպէս Մարգարիտ, Չեխովի «Բալենու այգի»՝ Ռանեւսկայա, Դիւրենմաթի «Ծեր տիկնոջ այցը»՝ Քլերի Ցախնասեան, Սարոյեանի «Իմ սիրտը լեռներում է»՝ Ջոնի, Շանթի «Հին աստուածներ»՝ Իշխանուհի եւ այլն։ Խաղցեր է նաեւ արեւմտահայի դերեր՝ «Պաղտասար Աղբար»՝ Անոյշ եւ այլն։ Նկարահանուեր է «Պատուի համար», «Մօր սիրտը», «Ճանապարհ դէպի կրկես», «Հայրիկ», «Կարինէ» եւ այլ ֆիլմերու մէջ։ Հայաստանի Ազգային ռատիոյի ոսկէ ֆոնդին ունի աւելի քան 100 ձայնագրութիւն։ 1958 թուականէն ան նկարահանուեր է հեռուստաներկայացումներու մէջ, ի դէպ՝ եղեր է առաջին հեռուստաներկայացման դերասանուհիներէն։ 1985 թուականին հրաւիրուեր է Սուրիոյ Հալէպ քաղաքի «Ադամեան» թատրոն, ուր արժանացեր է ոսկեայ շքանշանի։ Ստացեր է բազմաթիւ պետական բարձրագոյն պատուոգիրներ, մրցանակներ, շնորհակալագիրներ։ 1965 թուականին արժանացեր է ՀԽՍՀ, 1988 թուականին՝ ԽՍՀՄ ժողովրդական դերասանի կոչման։ 1995 թուականին պարգեւատրուեր է ՀՀ «Մովսէս Խորենացի» շքանշանով, 2001 թուականին՝ Երեւանի պատուաւոր քաղաքացիի կոչումով, 2013 թուականին՝ Սուրբ Մեսրոպ Մաշտոցի շքանշանով։ Թաղուած է Կոմիտասի անուան պանթէոնի տարածքին։