Ս.թ. Մարտի 25-ին Հայաստանի Հանրապետութեան կառավարութեան մէջ՝ վարչապետ Նիկոլ Փաշինեանի եւ Արցախի Հանրապետութեան նախագահ Արայիկ Հարութունեանի նախագահութեամբ, ՀՀ եւ ԱՀ կառավարութեան շարք մը անդամներու եւ «Հայաստան» համահայկական հիմնադրամի գործադիր տնօրեն Հայկակ Արշամեանի մասնակցութեամբ տեղի ունեցաւ խորհրդակցութիւն՝ նուիրուած Արցախի սոցիալ-տնտեսական խնդիրներուն։

Այս մասին  յայտնած է «Հայաստան» համահայկական հիմնադրամը։

Հանդիպման ընթացքին ընդգծեցին Արցախի մէջ բնակարանաշինութեան եւ ենթակառուցուածքներու վերականգնման ծրագիր իրականացնելու հրատապութիւնը: Ծրագիրի շրջանակներուն Արցախի մէջ շուրջ 6000 ընտանիք ապահով կ՛ըլլայ բնակարանով, կը ստեղծուին եւ կը վերականգնուին անհրաժեշտ ենթակառուցուածքներ:  Այս Ծրագիրը, ընթացքի մէջ գտնուող մնացած ծրագիրներու հետ միասին, հնարաւորութիւն կուտայ ապահովել տեղահանուած բոլոր ընտանիքներու վերադարձը Արցախի Հանրապետութիւն։

Հիմնադրամի քննարկմանը կը ներկայացուի անհրաժեշտ գումարը:

Հանդիպման արդիւնքին որոշուեցաւ նաեւ, որ ԱՀ կառավարութիւնն յառաջիկայ ժամանակ կը ներկայացնէ 2021-2024 թուականներու համար նախատեսուող Ծրագիրի մանրամասն նկարագիրը, որու իրականացման հարցերը կը քննարկուին ՀՀ կառավարութեան եւ Հիմնադրամի միջեւ: