Պատերազմի ընթացքին հրետակոծութիւններու հետեւանքով Արցախի Մարտունի շրջանի բնակավայրերուն մէջ ընդհանուր առմամբ տուժած է աւելի քան 1250 շէնք-շինութիւն:

Այս մասին «Արցախփրես»-ի թղթակիցի հետ զրոյցի ժամանակ տեղեկացուց Արցախի Հանրապետութեան քաղաքաշինութեան նախարար Արամ Սարգսեանը:

«Արցախի ամենաշատ տուժած բնակավայրերէն են նաեւ  Մարտունի քաղաքն ու շրջանի գիւղերը: Ներկայիս շինարարական ծաւալուն աշխատանքներ կընթանան Մարտունի քաղաքի, Թաղավարդի եւ Կարմիր Շուկային մէջ, որոնք ամենաշատը տուժած են: Մասնաւորապէս՝ Կարմիր Շուկային մէջ կը կառուցուի ընդհանուր առմամբ 150 տուն: Մարտունի շրջանի Կաղարծի գիւղին մէջ կը վերակառուցուի 14 բնակարանէ բաղկացած շէնք: Կուսումնասիրուի նաեւ Նորշեն գիւղի նախկին դպրոցական շէնքը՝ բնակարաններ վերակառուցելու նպատակով»,-հաւելեց քաղաքաշինութեան նախարարը:

Անդրադառնալով Ասկերանի շրջանի Աստղաշեն համայնքի հարեւանութեամբ տեղահանուած ընտանիքներու համար կառուցուող նոր բնակատեղի շինարարութեան ընթացքին նախարար Արամ Սարգսեանը տեղեկացուց,որ հողային աշխատանքներուն զուգահեռ՝ նաեւ առանձնատուներու հիմքերը կը դրուին:

Leave a Reply