Ն.Ս.Օ.Տ.Տ Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսն Ապրիլի 4-ին Մայր Աթոռ Սուրբ էջմիածինի մէջ ընդուներ է Եւրախորհրդարանի պատգամաւոր Ֆրանսուա-Քսաւիէ Բելամիին եւ պատգամաւորի գործընկեր Ժիսլեն Ֆրնաքուիլին՝ ՀՀ-ի մէջ Ֆրանսիայի Հանրապետութեան արտակարգ եւ լիազոր դեսպան Ժոնաթան Լաքոտի ուղեկցութեամբ: «Արմենփրես»-ի հաղորդմամբ, Մայր Աթոռի տեղեկատուական համակարգը կը տեղեկացնէ, որ նոյն օրն առաւօտեան ֆրանսիացի հիւրերը Երեւանի Ս․ Գրիգոր Լուսաւորիչ մայր եկեղեցիին մէջ ներկայ գտնուած են Հայրապետական Ս․ Պատարագին։

Ամենայն Հայոց Կաթողիկոսը, հանգամանօրէն ներկայացնելով Արցախեան երկրորդ պատերազմի պատճառած վնասները եւ առկայ մարտահրաւերները, յոյս յայտնեց, որ Ատրպէյջանի սանձազերծած ագրեսիան եւ անկէ բխող մնացած երեւոյթները կարժանանան միջազգային հանրութեան եւ Եւրախորհրդարանի պատշաճ արձագանքին։

«Վեհափառ Հայրապետը նշեց, որ սուրբ Յարութեան տօնին աղոթք բարձրացուցած է աշխարհին խաղաղութիւն տիրելու, մեր երկրի եւ ժողովուրդի համար»,- կ՛ըսուի հաղորդագրութեան մէջ:

Leave a Reply