ՀՀ ԱԳՆ-ն յայտարարութիւն տարածեր է Ատրպէյջանի կողմէ հայ ռազմագերիներու նկատմամբ քրեական հետապնդման վերաբերեալ:  

«Խիստօրէն կը դատապարտ ենք Ատրպէյջանի կողմէ Արցախի դէմ սանձազերծուած վերջին ագրեսիայի ընթացքին գերեվարուած Լիւդուիկ Մկրտչեանի եւ Ալիոշա Խոսրովեանի նկատմամբ պաշտօնական Պաքուի կողմէ քրեական հետապնդման փաստը: Համաձայն միջազգային մարդասիրական իրաւունքի, մասնաւորապէս` Ժնեւի կոնվենցիաներու՝ վերջիններս կը համարուին ռազմագերի, որոնք ռազմական գործողութիւններու աւարտէն ետք պէտք է անմիջապէս ազատ արձակուին: Մինչդեռ, Ատրպէյջանը անոնց դէմ հարուցեր է շինծու քրեական գործեր՝ անով իսկ բացայայտօրէն խախտելով թէ´ միջազգային մարդասիրական իրաւունքի նորմերը թէ´ 2020թ․ Նոյեմբերի 9-ի եռակողմ յայտարարութեամբ ստանձնած իր պարտաւորութիւնները»,- «Արմենփրես»-ի հաղորդմամբ նշուած է ՀՀ ԱԳՆ յայտարարութեան մէջ:

Նշուած է, որ չնայած միջազգային հանրութեան  բազմաթիւ կոչերուն՝ Ատրպէյջանը կը շարունակէ օգտագործել հայ գերիներուն՝ որպէս քաղաքական պատանդ եւ կը շարունակէ անոնց հանդէպ խոշտանգումներու եւ հոգեբանական ճնշման գործելակերպը: