Եւրոպական խորհուրդի նախագահ Շառլ Միշելը Հունիսի 2-ին Հայաստանի վարչապետի պաշտօնակատար Նիկոլ Փաշինեանի հետ հանդիպմանը, ինչպէս նաեւ Ատրպէյջանի նախագահ Իլհամ Ալիեւի հետ հեռախօսազրոյցի ժամանակ Հարաւային Կովկասի մէջ անվտանգութեան ու կայունութեան հաստատման տեսանկիւնէն կարեւոր  համարած է 2020 թուականի Նոյեմբերի 9-ի հրադադարի մասին յայտարարութեան լիակատար կեանքի կոչումը: Ինչպէս կը հաղորդէ «Արմենփրես»-ը, այս մասին յայտնած է ԵՄ պաշտօնական կայքը։

«ԵՄ-ն պատրաստ է խորհրդատւութիւն տրամադրել սահմանազատման եւ սահմանագիծման հարցով, ինչպէս նաեւ աջակցելու վստահութեան կառուցմանը: Եւրամիութիւնը նաեւ կը քաջալերէ երկու կողմերուն հրատապ կերպով համագործակցիլ գերիներու վերադարձի եւ ականապատուած դաշտերու լիակատար թափանցիկութեան, ինչպէս նաեւ այլ կարեւոր հումանիտար հարցերով: ԵՄ-ն շուրջ 20 մլն եւրոյ հումանիտար աջակցութիւն կը տրամադրէ ու կը շարունակէ ներգրաւուած ըլլալ»,- կ՛ըսուի ԵՄ յայտարարութեան մէջ:

Այս մարտահրաւերներուն լուծումներ տալը դէպի կայուն խաղաղ կարգաւորում տանող առաջին քայլն է միայն: «Եւրոպական խորհուրդի նախագահը կոչ ուղղած է կողմերուն վերսկսելու կառուցողական ոգով բանակցութիւնները: ԵՄ-ն մեծապէս հետաքրքրուած է Հարաւային Կովկասի տարածաշրջանին անվտանգութեամբ, կայունութեամբ եւ բարգավաճմամբ»,- նշուած է յայտարարութեան մէջ: