«Հունիսի 2-ին Ատրպէյջանի մէջ տեղի ունեցաւ հայկական կողմի գերիներ Լիուդվիկ Մկրտչեանի եւ Ալիոշա Խոսրովեանի իրաւունքները կոպիտ խախտող, միջազգային իրաւունքն ամբողջութեամբ ոտնահարող քրեական գործով դատական նիստը», – նշած է ՀՀ մարդու իրաւունքներու պաշտպանը՝ շարունակելով. – «ՀՀ մարդու իրաւունքներու պաշտպանի աշխատակազմը ուսումնասիրութեամբ արձանագրեր է, որ, ինչպէս կերեւէր ատրպէյջանական աղբիւրներով հրապարակուած տեսանիւթերէն ու լուսանկարներէն, դատական նիստերու դահլիճին մէջ գերիներ Լիուդվիկ Մկրտչեանի եւ Ալիոշա Խոսրովեանի նկատմամբ դրսեւորուած էր մարդու արժանապատուութիւնը բացայայտ նուաստացնող վերաբերմունք՝ անոնց պահելով ապակիա խուցի մէջ ու մեկուսացած վիճակով: Մշտադիտարկումը ցոյց  տուաւ, որ այդ վերաբերմունքն ու հրապարակումներն կատարուած են այն նպատակով, որ լրացուցիչ հոգեկան տառապանքներ պատճառեն գերիներու ընտանիքներու անդամներուն եւ լարուածութիւն առաջացնեն հայկական հասարակութեան մէջ: Ատրպէյջանի մէջ ապօրինի պահուող հայկական կողմի բոլոր զինծառայողներն ու քաղաքացիական անձինք կարգավիճակով գերի են. Անոնք գերեվարուած են զինուած հակամարտութեան ժամանակ եւ հիմայ այդ հակամարտութիւնը չէ աւարտուած: Աւելին, ատրպէյջանական իշխանութիւնները հայկական կողմի գերիներու նկատմամբ հետապնդումներ կը հարուցեն, անոնց այսպէս կոչուած «խոստովանական ցուցմունքներու» հիման վրայ», – շեշտեր է Հայաստանի մարդու իրաւունքներու պաշտպանը:
«Ուստի, Ատրպէյջանի մէջ ապօրինի պահուող հայ գերիներու նկատմամբ դատավարութիւններն ամբողջութեամբ կը հակասեն միջազգային իրաւունքի հիմքերուն եւ կոպտօրէն կը խախտեն գերիներու ու անոնց ընտանիքներու իրաւունքները, կը քաղաքականացնեն մարդասիրական հարցերը: