Շրջակայ միջավայրի համաշխարհային օրը գործարկուեր է ՀՀ բոյսերու եւ կենդանիներու Կարմիր գիրքերուն մէջ գրանցուած տեսակներու մասին տեղեկատուութիւն պարունակող «Red Book of Armenia» բջջային հաւելուածը։

«Արմենփրես»-ի հաղորդմամբ, այս մասին կը տեղեկացնէ ՀՀ շրջակայ միջավայրի նախարարութիւնը: Հաւելուածը մշակուեր է շրջակայ միջավայրի նախարարութեան եւ Հայաստանի մէջ Գերմանիայի միջազգային համագործակցութեան ընկերութեան համագործակցութեան շրջանակներուն։ Հաւելուածը նախատեսուած է iOS կամ Android շարժական օպերացիոն համակարգերով աշխատող գործիքներու համար։ «Red Book of Armenia» բջջային հաւելուածն ունի գիտական, էկոկրթական, ճանաչողութեան բարձրացման նպատակ։

Այն հնարաւորութիւն կուտայ ծանօթանալու ՀՀ բոյսերու եւ կենդանիներու Կարմիր գիրքի մէջ գրանցուած տեսակներու կենսաբանական դասակարգման, թուաքանակի, բնակեցման եւ տարածման վայրերու, ձեւաբանութեան եւ այլ տեղեկատուութեանը։  Գործուն քարտէսը հնարավորութիւն կուտայ տեսնելու այդ տեսակներու տարածուածութիւնը:Հաւելուածը հնարաւոր է ներբեռնել կայքին տեղադրուած հղումով՝ https://bit.ly/3ile0nV