Պատերազմէն ետք Հացի գիւղի բոլոր բնակիչները վերադարձեր են գիւղ:

Այս մասին «Արցախփրես»-ի թղթակիցի հետ զրոյցի ժամանակ ըսած է Հացի համայնքի ղեկավար Սանթուր Սարգսեանը:

Անոր խօսքով՝ բնակիչները սկսած են ապրիլ իրենց բնականոն կեանքով:

«Պատերազմէն ետք դպրոցը վերաբացուեր է 2020 թուականի Դեկտեմբերի 1-էն. այստեղ կը հաճախէ 13 աշակերտ: Մանկապարտեզ չունինք:

Ունինք բուժկէտ, ակումբ, հանդիսութիւններու սրահ, որոնք կը գտնուին լաւ վիճակով: Համայնքապետարանի շենը եւս կը գտնուի նորմալ վիճակով: Գիւղը գազաֆիկացուած է, ապահոված էլեկտրաէներգիայով: Ունինք ջուրի խնդիր: Մինչ պատերազմը համայնքին մէջ նոր ջրագիծի կառուցման աշխատանքներ կատարուած են, պատերազմէն ետք այդ աշխատանքները վերսկսեր են եւ ընթացքի մէջ են»,- տեղեկացուցած  է համայնքապետը:

Պատերազմի պատճառով գիւղը, բարեբախտաբար, վնասներ չէ կրած: Բնակչութեան հիմնական զբաղուածութիւնը անասնապահութիւնն ու հողագործութիւնն է:

Ս. Սարգսեանը նշած է, որ գիւղի երիտասարդները միտում չունին հեռանալու գիւղէն, անոնք կը շարունակեն ապրիլ ու արարել սեփական հողի վրայ, շենացնել ու զարգացնել Հացին: