Անհապաղ պաշտպանութեան կարիք ունեցող հայկական ոչ նիւթական մշակութային ժառանգութեան՝ արցախեան խոհանոցի, կենցաղի, արհեստներու կենսունակութեան պահպանութեան վրայ ուշադրութիւն հրաւիրելու նպատակով Հունիսի 19-ին Աշտարակի Պերճ Պռոշեանի տուն-թանգարանին մէջ տեղի կունենայ «Արցախի համն ու հոտը» խորագիրով փառատօնը:

«Արմենփրես»-ի հաղորդմամբ՝ ՀՀ ԿԳՄՍ նախարարութիւնէն կը յայտնեն, որ արցախեան թթուներու հարուստ տեսականին, համեղ ուտեստները, ձեռագործ աշխատանքները կը ներկայացնեն պատերազմի հետեւանքով տեղահանուած եւ Հայաստանի գիւղական եւ քաղաքային համայնքներուն մէջ բնակուող արցախցիները:

Կը կազմակերպուին ձեռարուեստի եւ ուտեստի պատրաստելու վարպետաց դասեր, ուտեստներու համտես-վաճառք, ինչպէս նաեւ կը ցուցադրուին Սիւնիք-Արցախի տարազային համալիրները՝ ապահովելով Արցախի կոլորիտն ու շունչը:

Փառատօնը, որու մուտքն ազատ է, պիտի անցկացուի «Տերեան մշակութային կենտրոն» ՀԿ-ի նախաձեռնութեամբ եւ ՀՀ կրթութեան, գիտութեան, մշակոյթի եւ սպորտի նախարարութեան աջակցութեամբ: