Արեւմտեան Հայաստանի կառավարութեան ներկայացուցիչները յայտարարած են, որ ՄԱԿ-ի մէջ նախատեսուած հանդիպումներուն ընթացքին պիտի բարձրացնեն Արեւմտեան Հայաստանի տարածքին հայ ժողովուրդի՝ որպէս բնիկ ժողովուրդ ապրելու, հող ունենալու եւ ինքնակազմակերպուելու իրաւունքի հարցը։
Անոնք ընդգծած են, որ այս նախաձեռնութեան նպատակը միայն Հայերու ցեղասպանութեան միջազգային ճանաչման հարցին անդրադառնալը չէ, այլ նաեւ պատմական հայրենիքին մէջ հայ ժողովուրդի իրաւունքներու պաշտպանութեան խնդիրը միջազգային հարթակներու վրայ ներկայացնելը։ Քննարկումներուն ընթացքին պիտի շեշտուին պահանջատիրութեան, պատմական արդարութեան եւ բնիկ ժողովուրդներու իրաւունքներու պաշտպանութեան վերաբերող հիմնահարցերը։
Ներկայացուցիչները նաեւ նշած են, որ նպատակ ունին հանրութեան ներկայացնելու ՄԱԿ-ի մէջ իրականացուող աշխատանքներու ընթացքը, հրապարակելու տեսանիւթեր եւ ուղերձներ՝ ներկայացնելով կատարուող գործունէութիւնը եւ առաջիկայ ծրագիրները։