Օգոստոսի 7-8-ը Երևանի Մեսրոպ Մաշտոցի անվան Մատենադարանում անցկացվել է «Կոստանդնուպոլսի հայ տպագրիչները» միջազգային աշխատաժողովը։ Մասնագետները ներկայացրել են պոլսահայ տպագրիչների, տառաստեղծների և նկարազարդողների կարևոր ներդրումը Օսմանյան կայսրության և տարածաշրջանի տպագրական մշակույթի զարգացման գործում։
Առանձնահատուկ ուշադրություն է դարձվել Պողոս Արապյանի և Հովհաննես Մյուհենտիսյանի նորարարություններին, հայատառ թուրքերենին, վիմագրությանը և Ստեփան Ակայանի ստեղծագործական ժառանգությանը։
Աշխատաժողովին հաջորդած ցուցադրությունում ներկայացվել են 19-րդ դարի հազվագյուտ բազմալեզու հրատարակություններ՝ ընդգծելով պոլսահայ տպագրության կարևոր տեղը համաշխարհային գրատպության պատմության մեջ։