Փրակայի Սուրբ Հոգի եկեղեցւոյ մէջ տեղի ունեցաւ Կոմիտաս Վարդապետի կեանքին եւ ստեղծագործութեան նուիրուած երաժշտական երեկոյ։ Հայաստանէն ժամանած երգիչ Հայկ Պետրոսեան ներկայացուց մեծ երգահանին ժառանգութեան ժողովրդական ակունքները՝ կատարելով Կոմիտասի ստեղծագործութիւնները եւ պատմելով անոնց մասին։
Երեկոյին ընթացքին հնչեցին Կոմիտասի հոգեւոր ստեղծագործութիւնները՝ Հայկ Սրկ. Ութիճեանի, Անուշ Պատալեանի եւ Բարսեղ Վրդ. Փիլաւճեանի կատարումով։ Ձեռնարկը եզրափակուեցաւ համատեղ կատարումով՝ «Կանչէ՛, կռունկ, կանչէ՛» ժողովրդական երգով։
Նոյն օրը Փրակայի Ռատեկ Պրժոպոհաթիի թատրոնին մէջ տեղի ունեցաւ նաեւ հայկական երգարուեստի համերգ, ուր ելոյթ ունեցան հայ երաժիշտներ եւ երգիչներ՝ ներկայացնելով ժողովրդական, դասական եւ հեղինակային ստեղծագործութիւններ։
Հայկական երաժշտութեան այս երեկոները դարձան մշակութային կամուրջ՝ Փրակայի հայ համայնքին փոխանցելով Կոմիտասի եւ հայկական երգարուեստի հարուստ ժառանգութիւնը։