Երեւանի 23-րդ «Ոսկէ ծիրան» միջազգային կինոփառատօնը աւարտեց իր աշխատանքները։ Կինոյի տան մէջ կայացած փակման արարողութեան ընթացքին ժիւրին յայտարարեց մրցանակակիրներուն անունները։

Միջազգային լիամետրաժ ֆիլմերու մրցոյթին գլխաւոր մրցանակը՝ «Ոսկէ ծիրանը», շնորհուեցաւ Մելագրոս Մումենթալերի «Հոսանքներ» (The Currents) ֆիլմին։ «Արծաթէ ծիրանը» ստացաւ Մորթեզա Ահմադվանդի եւ Ֆիրուզէ Խոսրովանի «Անցեալ․ ապառնի․ շարունակական» (Past, Future, Continuous) ֆիլմը, իսկ Սեբաստիան Բրամեսհուբերի «Լոնտոն» (London) ֆիլմը արժանացաւ ժիւրիի յատուկ յիշատակումին։

Տարածաշրջանային մրցոյթին «Ոսկէ ծիրանը» շնորհուեցաւ Ամիր Ազիզիի «Ամիրի հոգում» (Inside Amir) ֆիլմին, իսկ «Արծաթէ ծիրանը»՝ Ալեքսանդրէ Քոբերիձէի «Չորացած տերեւ» (Dry Leaf) ֆիլմին, որ ստացաւ նաեւ FIPRESCI մրցանակը։

Կարճամետրաժ ֆիլմերու «Կորիզ» մրցոյթին «Ոսկէ ծիրանը» ստացաւ Սերուժ Յովսէփեանի «Մենաւոր երկխօսութիւններ» (Dialogues Solitaire) ֆիլմը, որ արժանացաւ նաեւ Գենադի Մելքոնեանի անուան յատուկ մրցանակին։ «Արծաթէ ծիրանը» շնորհուեցաւ Օվսաննա Գէորգեանի «Վարձու սգաւորներ» (Paid Mourners) ֆիլմին։

Ժիւրին նաեւ յատուկ յիշատակումներ շնորհած է Սոնա Խաչատրեանի «Ռելիքվիա» (Relic) եւ Արթուր Սահակեանի «Մինակ Երկուսով» (Together Alone) ֆիլմերուն։

Բացի այդ, Թերեզա Նվոտովայի «Հայրը» ֆիլմը արժանացած է նաեւ Հայաստանի եւ Վրաստանի մէջ տարածման մրցանակին, որ կը ներառէ 6,000 եւրոյի նիւթական աջակցութիւն՝ ֆիլմին տարածաշրջանային տարածումը ապահովելու նպատակով։

Փառատօնը եզրափակուեցաւ Գոտֆրի Ռեջոյի «Ժուկով-ժամանակին» ֆիլմի առաջին ցուցադրութեամբ։