ՀՀ Մարդասիրական խումբի ներկայացուցիչ գնդապետ Արկատի Տօնոյեանը դիմատետրի իր էջին  գրած է, որ «Մարդասիրական Ականազերծման եւ Փորձագիտական Կեդրոն»ի ականազերծողները մաքրած եւ սուրիական իշխանութիւներուն յանձնած են ականազերծուած աւելի քան 880 հազար քառակուսի մեթր տարածք, իսկ բժշկական խումբը բուժօգնութիւն ցուցաբերած է 42 հազարէն աւելի տեղաբնակներու: Երկու ականադաշտ՝ մօտաւորապէս 450 000 քառակուսի մեթր ընդհանուր մակերեսով շահագործման յանձնուած է Հալէպի իշխանութիւններուն: Ականազերծման աշխատանքներուն ընթացքին յայտնաբերուած եւ վնասազերծուած են աւելի քան 190 զինամթերք եւ ենթազինամթերք՝ հակահրասայլային եւ հակահետեւակային ականներ, հրետանային արկերու եւ օդային ռումբի մնացորդներ, ականներ եւ ինքնաշէն պայթուցիկ առարկաններ: Հալէպի իշխանութիւններուն յանձնուած են ականազերծուած տարածքներու քարտէզները: Խումբի ղեկավար Սերկօ Աւետիսեան համառօտ ներկայացուցած է կատարուած աշխատանքները եւ վստահութիւն յայտնած՝ անոնց շարունակականութեան մասին: Փոխնահանգապետը կարեւոր համարած է կեդրոնի աշխատանքները եւ յոյս յայտնած, որ ականազերծման գործընթացի աշխուժացումը պիտի նպաստէ Հալէպի ժողովուրդի իրենց բնակավայրեր վերադարձին.