2022 թվականի  դեկտեմբերի 12-13-ին Երևանում տեղի կունենա «Ընդդեմ ցեղասպանության հանցագործության» 4-րդ գլոբալ ֆորումը՝  «Ցեղասպանության կանխարգելումը նոր տեխնոլոգիաների դարաշրջանում» խորագրով:

ՀՀ արտաքին գործերի փոխնախարար  Վահե Գևորգյանը նշել է, որ ֆորումին  մասնակցելու են շատ հեղինակավոր, այս ասպարեզում խոսք ունեցող անհատներ: Լինելու է մոտ 250 մասնակից, 30  միջազգային հեղինակավոր բանախոսներ, գիտնականներ, բարձրաստիճան պաշտոնյաներ, տեխնոլոգիական ընկերությունների ներկայացուցիչներ:

«Պատմությունից լավ գիտենք, որ միջազգային անվտանգության համակարգի փլուզումը մշտապես հանգեցնում է մարդկության դեմ հանցագործությունների և այլ զանգվածային  վայրագությունների, և այս համատեքստում անցկացնել գիտաժողով  և հրավիրել ցեղասպանության կանխարգելման գործում ներգրավված շրջանակների, ինքնին կարևոր է»,- ասաց փոխնախարարը։ 

Ըստ նրա՝ ցեղասպանության իրականացումը երբեք էլ դյուրին գործ չի եղել. այն պահանջել է երկարատև ցեղասպան գաղափարի քարոզ հասարակության տարբեր շերտերի մեջ, այն պահանջել է հսկայական ծավալի մարդկանց կազմակերպված սպանություն, և այդ տեսակետից ցեղասպանությունների էջը բացվում է 20-րդ դարից և Արևմտյան Հայաստանում հայերի դեմ իրականացված ցեղասպանությունը  առաջիններից է: