Երուսաղեմի հայկական թաղամասում հինգ տարի տևած վերակառուցումից հետո իր դռներն է վերաբացել Հայաստանի պատմության թանգարանը: Այս մասին  հայտնում է The Times Of Israel-ը։

Տնօրեն Ցողիկ Կարակաշյանը նշել է, որ թանգարանը նախատեսված է ծառայելու որպես «հայերի կյանքի ուղեցույց»։

Մինչ վերակառուցումը թանգարանի շենքը, որն ի սկզբանե եղել է 1850-ականներին կառուցված ուխտավորների պանսիոնատ, ծառայել է որպես վանք, մանկատուն ցեղասպանությունից փրկված երեխաների համար, սեմինարիա և, վերջապես, փոքրիկ թանգարան և գրադարան։

Թանգարանի կենտրոնական ցուցանմուշը 5-րդ կամ 6-րդ դարերի խճանկարն է, որը հայտնաբերվել է 1894 թվականին հին հայկական վանական համալիրի տարածքում։ Այն ունի հայերեն մակագրություն՝ նվիրված «բոլոր հայերի հիշատակին և փրկությանը, որոնց անունները Տերը գիտի»։

Թանգարանը ցուցադրում է հայկական նյութական արվեստը, ինչպես նաև պատմում է տարածաշրջանում գոյատևման հայկական պատմությունը:

Երուսաղեմում ապրում է մոտ 6000 հայ, որոնցից շատերը հայերի դեմ իրագործված ցեղասպանությունից մազապուրծ փրկվածների ժառանգներ են։

Leave a Reply