Եվրախորհրդարանի ավելի քան 60 անդամներ նամակ են հղել Եվրահանձնաժողովի փոխնախագահ, ԵՄ Բարձր ներկայացուցիչ Ժոզեպ Բորելին՝ պահանջելով պատժամիջոցներ սահմանել Բաքվի նկատմամբ Արցախում իր լայնածավալ հարձակման համար։ Այս մասին X-ի իր միկրոբլոգում հայտնել է ֆրանսիացի պատգամավոր, Եվրախորհրդարանի անվտանգության և պաշտպանության ենթահանձնաժողովի ղեկավար Նատալի Լոազոն։
«Ավելի քան 60 եվրոպացի պատգամավորներ հետևեցին ինձ՝ պահանջելով, որ Եվրոպան պատժամիջոցներ սահմանի Իլհամ Ալիևի վարչակարգի դեմ Արցախի հայ բնակչության վրա հարձակման համար», – հայտնել է Լուազոն՝ գրառմանը կցելով Բորելին ուղղված նամակի պատճենը։
Ինչպես ասվում է նամակի տեքստում, պատգամավորները ԵՄ-ին կոչ են անում միջոցներ ձեռնարկել էթնիկ զտումները և նոր պատերազմը կանխելու համար։
«Բաքուն նոր հարձակում է սկսել Արցախի հայերի դեմ։ Մենք կոչ ենք անում ԵՄ-ին անհապաղ գործողություններ ձեռնարկել՝ վերջ դնելու սկսվող էթնիկ զտմանը և թույլ չտալու, որ այս հարձակումը վերածվի նոր պատերազմի», – գրված է նամակում։
Պատգամավորները Բորելին հարցնում են, թե «ինչ քայլեր է պատրաստվում ձեռնարկել ԵՄ արտաքին քաղաքականության ծառայությունը՝ ի պատասխան Բաքվի կողմից Արցախի վրա հարձակման, և ինչպիսի պատժամիջոցներ է պատրաստվում կիրառել ԵՄ-ն հրադադարի ռեժիմը խախտելու համար պատասխանատու Բաքվի իշխանությունների նկատմամբ»։