ՀՀ նախագահ Արմեն Սարգսյանը «Россия 24» հեռուստաալիքի հետ հարցազրույցում խոսել է նոր երկրի նոր վարչապետի հետ աշխատանքի և ռուս-հայկական հարաբերությունների մասին:
Նրա խոսքով՝ Հայաստանի Հանրապետության և Ռուսաստանի միջև հարաբերությունները կարող են ավելի խորը և ընդարձակ լինել ինչպես մշակութային, այնպես էլ տնտեսական տեսանկյունից:
«Ես մի քիչ դժգոհ եմ մեր հարաբերություններից, քանի որ իմ պատկերացմամբ մենք կարող էինք ավելի խորը և ընդարձակ հարաբերություններ ունենալ։ Ես գոհ չեմ, թե ինչպես ենք մենք այսօր ներկայանում Ռուսաստանում: Թեև մոտ 3 միլիոն հայ է ապրում Ռուսաստանում, գրեթե նույնքան, որքան Հայաստանում»,- ասել է Արմեն Սարգսյանը՝ ընդգծելով, որ խոսքը կրթական և մշակութային ներկայության մասին է։
Նախագահը նշել է, որ իրեն չի գոհացնում նաև տնտեսական հարաբերությունները. «Մենք կարող ենք շատ ավելին անել: Հայաստանը կարող է իրական գործընկեր դառնալ Ռ Դ և Եվրասիական տարածքի երկրների համար որոշակի ոլորտներում, օրինակ՝ նոր տեխնոլոգիաների: Մենք տեղեկատվական տեխնոլոգիաների շատ արագ զարգացում և ներուժ ունենք»։
Ինչ վերաբերում է Եվրասիական տնտեսական միությանը անդամակցությանը, Սարգսյանի խոսքով, Հայաստանի Հանրապետությունն ամբողջությամբ չի բացել իր բոլոր հնարավորությունները: