Այսօր՝ հոկտեմբերի 29-ին, Մարտակերտի շրջանի Թալիշ գյուղում տեղի է ունեցել խաչքար-հուշարձանի բացման հանդիսավոր արարողություն:

 02

ՍՏԵՓԱՆԱԿԵՐՏ, հոկտեմբերի 29, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ խաչքար-հուշարձանը նվիրված էր ապրիլյան քառօրյա պատերազմում զոհված Սիսիանի ջոկատի ազատամարտիկներին, որը կանգնեցվել է ջոկատի հրամանատար Աշոտ Մինասյանինախաձեռնությամբ: Թեև գյուղում, անվտանգության նկատառումներից ելնելով, բնակիչները մշտական բնակություն չունեն, սակայն միջոցառման առիթով բազմաթիվ մարդիկ էին հավաքվել. եկել էին նաև ապրիլյան քառօրյա պատերազմում զոհված` Սիսիանի ջոկատի ազատամարտիկների հարազատները՝ հարգելու հայրենիքի համար իրենց կյանքը զոհաբերած հայորդիների հիշատակը:Բացման հանդիսավոր արարողությանը մասնակցում էր նաև Արցախի Հանրապետության նախագահ Բակո Սահակյանը, ով իր խոսքում, մասնավորապես, նշել է, որ այս պահին բոլորս համակված ենք տարբեր զգացումներով. մի կողմից կա խոր թախիծ և տխրություն, քանի որ հիշում ենք մեր նահատակված ընկերներին, մյուս կողմից մենք լի ենք հպարտությամբ, որ ունենք այդպիսի հերոս մարտիկներ, որոնց կերպարը միշտ կենդանի է մեր սրտերում: Երկրի ղեկավարն ընդգծել է, որ ապրիլյան պատերազմի ժամանակ հակառակորդի դրսևորած ծայրահեղ լկտի ու սանձարձակ պահվածքը նոր սրբագրումներ է կատարել ղարաբաղյան կողմի ունեցած մոտեցումներում, և այն կրկնվելու դեպքում, հայկական կողմի պատասխանը լինելու է խիստ և կտրուկ: «Փա՛ռք ու պատիվ հայրենիքի համար իրենց կյանքը զոհած մեր բոլոր ազատամարտիկներին: Նրանք մեկ անգամ ևս հաստատել են այն իրողությունը, որ հայրենիքը սակարկման ենթակա չէ, և պետք է ամեն ինչ անենք մեր երկրի սահմաններն ամուր պահելու համար»,- ասել է նախագահը և հավելել, որ դրանով իսկ վառ կպահենք մեր զոհված տղաների հիշատակը:0002

 

Հուշաքարի բացման առթիվ հանդիսավոր տողանով անցել է ՊԲ պատվո պահակախումբը, իսկ մի խումբ ազատամարտիկներ պարգևատրվել են պաշտպանության նախարարության շնորհակալագրերով ու ձեռքի ժամացույցներով:
Ելույթներով հանդես են եկել նաև միջոցառման մասնակիցները, իսկ հուշաքարի բացումը կատարել են զոհված ազատամարտիկների հարազատները:
Ինչպես «Արցախպրես»-ի հետ զրույցում ասել է խաչքար-հուշարձանի հեղինակ Վարազդատ Համբարձումյանը, հուշաքարի վրա պատկերված թուր-խաչերը խորհրդանշում են սիսիանցի ազատամարտիկներին: «Խաչը, ինչպես գիտենք, քրիստոնեության խորհրդանիշն է համարվում: Սակայն երբ հայրենիքը վտանգի մեջ է, մեր խաչը պետք է թուր դառնա, որպեսզի կարողանանք պաշտպանել մեր հավատքն ու հայրենիքը»,- ասել է վարպետը և ավելացրել, որ Թալիշի կենտրոնում տեղադրելու գաղափարը ևս խորհուրդ ունի: Ըստ հեղինակի՝ հուշաքարը կանգնեցվել է այն մեծ ցանկությամբ, որ հաջորդ հուշաքարը կլինի գյուղի վերածնունդը ու բնակիչների վերադարձը խորհրդանշող «կենաց ծառը»:
 
04
Թալիշի համայնքի ղեկավար Վիլեն Պետրոսյանը, ով շարունակում է պաշտոնավարել այժմ արդեն Ալաշան համայնքում, մեր թղթակցի հետ զրույցում ասել է, որ, ապրիլյան դաժան օրերից հետո, Թալիշում խաչքարի տեղադրումը մեծ խորհուրդ ունի: «Յուրաքանչյուր նման միջոցառման ներկա գտնվելով՝ մեծ ցավ ու վիշտ ենք ապրում, որովհետև դա կապված է մեր մարտական ընկերների կորստի հետ: Կարծում եմ, որ այս խաչքարը, այն բոլոր սրբատեղիների հետ միասին, որոնք կան Թալիշի տարածքում, իր իմաստով ու բովանդակությամբ պետք է վերածնի կյանքը Թալիշում, և մեր համայնքը պետք է հարատևի՝ վերականգնելով իր վաղեմի փառքը: Մենք այդ օրվան սպասում և հավատում ենք»,- ասել է համայնքի ղեկավարը:
03
Իսկ սիսիանցի ազատամարտիկ Գրիշա Միրզոյանը, ով ապրիլյան պատերազմի օրերին դրսևորած արիության համար այսօր ԼՂՀ ՊՆ կողմից արժանացել է շնորհակալագրի, մեզ հետ զրույցում նշել է, որ 90-ականների սկզբից ակտիվ մասնակցություն է ունեցել արցախյան պատերազմին, իսկ ապրիլյան օրերին Սիսիանի ջոկատի տղաների հետ գտնվում էր հենց Թալիշի հատվածում: «Ադրբեջանցին չի փոխվել, գրեթե նույն վախկոտ զինվորն է, որին տեսել ենք 90-ականների սկզբին: Ապրիլյան օրերին ևս թշնամու կողմից կռվին մասնակցում էին օտարերկրյա վարձկաններ: Եթե այդքան ինքնավստահ էին, ապա ինչումն էր կայանում վարձկանների անհրաժեշտությունը: Իսկ փոխարենը կարող եմ ասել, որ մեր տղաները իրենց համարձակությամբ, հաստատ, ավելի ուժեղ են, քան ժամանակին մենք էինք, քանի որ 90-ականների պատերազմում մենք լուրջ ռազմական փորձի պակաս ունեինք, չկար կանոնավոր ոչ մի մատակարարում, իսկ այսօր ունենք բոլորովին հակառակ պատկերը, և ապրիլին բոլորս սպասում էինք «առա ՛ջ» հրամանին»,- ասել է ազատամարտիկը և նշել, որ յուրաքանչյուր պահի պատրաստ է մասնակցելու հայրենիքի պաշտպանության սուրբ գործին:
 
Միջոցառմանը մասնակցում էին ԼՂՀ Ազգային ժողովի նախագահ Աշոտ Ղուլյանը, ՀՀ Ազգային ժողովի նախագահի տեղակալ Էդուարդ Շարմազանովը, պաշտոնատար այլ անձինք, ներկայայացուցիչներ Հայաստանից ու Սփյուռքից:
http://artsakhpress.am/arm/news/54510/talishum-khachqar-hushardzan-e-bacvel—nvirvats-aprilyan-paterazmum-zohvats-sisianci-azatamartiknerin-lusankarner.html