Վանդալիզմի դեպքեր՝ Ստեփանակերտում

  • by Western Armenia, 12 Փետրվարի, 2024 in Մշակույթ
75 դիտում

Հայկական պատմամշակութային ժառանգության յուրացման և ոչնչացման՝  ադրբեջանական պետական մակարդակով վանդալիստական քաղաքականությունը բռնազավթված Արցախում շարունակում է երկրաչափական  պրոգրեսիայով  աճել: 

Հայքի”  մշակույթի Օմբուդսմեն Հովիկ Ավանեսովն այս անգամ ահազանգում է Ստեփանակերտում վանդալիզմի դեպքերի մասին.”Ադրբեջանական «REAL TV» ալիքն՝ իր յութուբյան հարթակում փետրվարի 4-ին հրապարակեց տեսանյութ՝ օկուպացված Ստեփանակերտից: Տեսանյութի նախնական ուսումնասիրությունները ցույց  են տալիս, որ  Ստեփանակերտի Հեքիմյան թաղամասում  գտնվող Սուրբ Հակոբ եկեղեցու խաչը հանված է, բացակայում է նաև բակում  գտնվող խաչքարը: Հետագայում՝ այլ տեղեկատվության պարագայում,  հանդես կգանք հավելյալ հրապարկմամբ: 

Եկեղեցու հիմքերը դրվել են 2005 թվականի սեպտեմբերին, իսկ կառուցման աշխատանքները տևել են շուրջ 1,5 տարի՝ մինչև 2007 թ.-ի մայիսի 6:

Փետրվարի  6-ին  ֆեյսբուքյան  օգտատեր  Մխիթար Կարապետյանը հայտնել է, որ ֆեյսբուքյան օգտատեր Ռաֆիկ Մեխտիևն իր էջում բռնազավթված Ստեփանակերտից հրապարակել է հերթական  տեսանյութը, որում  բացակայում  էր  Ադմիրալ  Իսակովի կիսանդրին: Կարապետյանը հավելեց, որ  այդ մասին նաև հրապարակվել  է տելեգրամյան ալիքում: Համապատասխան  մշտադիտարկումներից պարզեցինք, որ  նշված  տեսանյութը Ռաֆիկ Մեխտիևը հրապարակել  է  հունվարի  30-ին: Այդ  տեսանյութում ակնհայտ  երևում է, որ Ստեփանակերտի Ադմիրալ Իսակովի փողոցում տեղադրված հերոսի կիսանդրին ևս դարձավ  Ադրբեջանի  կողմից  պետական  մակարդակով  իրականացվող  մշակութային  ցեղասպանության  զոհ: Ստեփանակերտում տեղի ունեցած հերթական  վանդալիզմի մասին ահազանգեց Արցախի մշակութային ժառանգության պաշտպանության հանրային խորհրդի ՀԿ նախագահ Սերգեյ Շահվերդյանը՝  ֆեյսբուքյան իր էջում հրապարակելով ադրբեջանցիների կողմից քանդված Ալեքսանդր  Մյասնիկյանի արձանի լուսանկարները։

Փետրվարի 9-ին «Արարատ» տելեգրամյան ալիքը հրապարակեց բռնազավթված Հադրութում  տեղի  ունեցած հերթական սրբապղծության լուսանկար: Արցախի Հադրութի՝ պատմական Դիզակի տարածքում օկուպանտի  կողմից  պղծվել է Հադրութի Սբ․ Հարություն եկեղեցու  բակում  գտնվող  վանականներից մեկի տապանաքարը: 

Այս ամենը ևս մեկ անգամ ապացուցում է, որ Բաքվի ռեժիմի կողմից Արցախի պատմամշակութային ժառանգության ոչնչացման քաղաքականությունը պետական ​​մակարդակով քաղաքականություն է։