Ներկայիս Թուրքիայի օկուպացիայի տակ գտնվող Ալեքսանդրեթի (Հաթայ) Դյորթյոլ շրջանի Օզերլի թաղամասում պահպանվել են տարիներ շարունակ անուշադրության մատնված հայկական եկեղեցու ավերակները։ Ենթադրվում է, որ դրանք 1877 թվականին կառուցված Սուրբ Գրիգոր Լուսավորիչ եկեղեցու մնացորդներն են։

Պատմական աղբյուրների համաձայն՝ 19-րդ դարի վերջին Օզերլին շուրջ 300 տուն ունեցող բնակավայր էր, որտեղ ապրում էր 250 հայկական և 50 իսլամական ընտանիք։ Գյուղում գործել են եկեղեցի, դպրոց, շուկա և այլ կառույցներ։

Այսօր եկեղեցին գտնվում է անմխիթար վիճակում․ փլուզվել է հին տանիքը, փակվել են պատուհանները, իսկ գլխավոր մուտքի պատմական արձանագրությունը ջնջվել է։ Կառույցը տարիներ շարունակ օգտագործվել է նաև որպես ախոռ և այծերի ապաստարան։

Եկեղեցու պահպանության հիմնական խնդիրներից մեկը համարվում է դրա սեփականության անորոշ կարգավիճակը։ Կառույցը պաշտոնական գրանցումներում նշված է որպես «ավերակ շենք և հողատարածք», ոչ թե պատմական կամ կրոնական հուշարձան՝ այն դնելով վերջնական կորստի վտանգի առաջ։