Արարատ լեռան մոտ գտնվող Դուրուփընար երկրաբանական կազմավորման շրջանում Նոյյան տապանի ենթադրյալ մնացորդների որոնման ընթացքում հետազոտողները նոր տվյալներ են ստացել։ Հետազոտական խումբը տարածքում իրականացրել է եռաչափ մոդելավորում, GPS չափումներ, քարտեզագրում և ստորգետնյա ռադարային սկանավորում։
Հետազոտության ղեկավար, պրոֆեսոր Ջենկեր Աթիլան հայտնել է, որ տարածքում հայտնաբերվել են մի շարք երկրաբանական անոմալիաներ, այդ թվում՝ հնարավոր դատարկություններ և ուղիղ անկյան տակ հատվող կառուցվածքներ։ Ուսումնասիրության ընթացքում նախատեսվում է վերլուծել շուրջ 1000 հողի նմուշ։
Նախնական տվյալներով՝ ենթադրյալ ներքին հատվածից վերցված որոշ նմուշներում ածխածնի պարունակությունը մոտ 40 տոկոսով բարձր է եղել, քան արտաքին հատվածներից վերցված նմուշներում։ Ըստ հետազոտողների՝ դա կարող է վկայել օրգանական նյութի կամ փայտային մնացորդների առկայության մասին։
Սակայն Աթիլան ընդգծել է, որ այս արդյունքները դեռևս չեն հաստատում Նոյյան տապանի հայտնաբերման փաստը։ Վերջնական լաբորատոր արդյունքները սպասվում են առաջիկա երկու-երեք ամիսներին, իսկ ուսումնասիրությունները շարունակվում են։