Շըրնաքի Իդիլ (Ազախ) շրջանում գտնվող Մարիամ Աստվածածին եկեղեցին համարվում է տարածաշրջանի կարևորագույն քրիստոնեական և մշակութային հուշարձաններից մեկը։ Եկեղեցու պատմությունը, ըստ տեղական աղբյուրների, հասնում է մինչև մ.թ. 57 թվականը՝ քրիստոնեության տարածման վաղ շրջանը։
Իդիլի կենտրոնում ժամանակին գործել է ութ եկեղեցի, որոնցից այսօր միայն Մարիամ Աստվածածին եկեղեցին է շարունակում ծառայել որպես գործող աղոթավայր։
Եկեղեցու նախնական անվանումը, ըստ ավանդության, եղել է Մոր Յուհան։ Նշվում է, որ տարածաշրջանում քրիստոնեությունը տարածել են առաքյալների հետևորդները, ինչից հետո Իդիլում կառուցվել են բազմաթիվ եկեղեցիներ։ 1710 թվականին եկեղեցին ստացել է Մարիամ Աստվածածին անունը։
Սկզբնապես եռամաս կառուցվածք ունեցող եկեղեցու հատվածներից մեկը պատերազմների, ավերածությունների և բնական աղետների հետևանքով չի պահպանվել։ Մյուս երկու հատվածները հասել են մեր օրերը։
Քարաշեն, բազիլիկ հատակագծով և երեք նավով կառույցը 2008 թվականին ենթարկվել է լայնածավալ վերականգնման։ Եկեղեցու հարևանությամբ կառուցվել է նաև շուրջ 250 անձի համար նախատեսված հյուրատուն։
Մարիամ Աստվածածին եկեղեցին այսօր ոչ միայն գործող քրիստոնեական սրբավայր է, այլև Իդիլի բազմաշերտ պատմության և մշակութային ժառանգության կարևոր վկայություն։ Դարերի ընթացքում պահպանված այս հուշարձանի պաշտպանությունն ու ապագա սերունդներին փոխանցումը կարևոր նշանակություն ունեն տարածաշրջանի պատմական հիշողության պահպանման համար։