Արևմտյան Հայաստանի Հանրապետության նախագահ Արմենակ Աբրահամեանը, ինչպես նաև Ազգային ժողովի նախագահ Նելլի Հարությունյանը մասնակցել են ազգային հերոս Աշոտ Ղուլյանի՝ Բեկորի հիշատակի արարողությանը նվիրված միջոցառմանը, որը կայացել է Իսահակյանի գրադարանում։
Միջոցառման շրջանակում ցուցադրվել է Բեկորի կյանքի և մարտական ուղու մասին վավերագրական ֆիլմ։ Ներկաները հնարավորություն են ունեցել դիտելու հերոսի մասին պատմող հուզիչ կադրեր, ինչպես նաև հիշատակվել է Բեկորի և նախագահի հանդիպման մի փոքր պատմություն, որը ևս մեկ անգամ ընդգծել է նրա նվիրվածությունն ու ազգային գաղափարներին հավատարմությունը։
Իր ելույթում նախագահ Արմենակ Աբրահամեանը խոսել է Աշոտ Բեկորի մասին՝ նրան բնութագրելով որպես ազգային հերոս, ով իր կյանքը նվիրեց հայրենիքի պաշտպանությանը։ Նա նշել է, որ Բեկորի կերպարը պետք է օրինակ լինի նոր սերնդի համար՝ հայրենասիրության, խիզախության և անձնազոհության խորհրդանիշ։
Հիշատակի միջոցառումը անցել է հուզիչ և արժանապատիվ մթնոլորտում՝ ընդգծելով, որ Բեկորի հիշատակը շարունակում է ոգեշնչել և միավորել հասարակությանը։