Դերիքի Սուրբ Գևորգ եկեղեցու շուրջ վեճ է առաջացել
Մարդինի Դերիք շրջանում գտնվող պատմական Սուրբ Գևորգ հայկական եկեղեցու պահպանության և սեփականության հարցի շուրջ տարաձայնություններ են առաջացել։ Եկեղեցու պահպանությամբ տարիներ շարունակ կամավոր զբաղված Զեքերյա Սաբունջիի և Քեչեջիօղլու ընտանիքի միջև վեճը կապված է եկեղեցու կողպեքների փոփոխության, դրա վիճակի և պատմական որմնանկարների տեղափոխման հետ։
Քեչեջիօղլու ընտանիքը հայտարարել է, որ Սաբունջին առանց իրենց տեղեկության փոխել է եկեղեցու կողպեքը, իսկ եկեղեցին գտնվում է անտեսված վիճակում։ Ընտանիքը նաև հարցեր է բարձրացրել եկեղեցու պատմական որմնանկարների գտնվելու վայրի և դրանց տեղափոխման հանգամանքների վերաբերյալ։
Ի պատասխան՝ Սաբունջիի որդին՝ Ղազար Սաբունջին, նշել է, որ որմնանկարները, որոնք թվագրվում են 18-րդ դարին, վերականգնման նպատակով Ստամբուլ են տեղափոխվել Պոլսո Հայոց պատրիարքարանի տեղեկությամբ և ներկայում պահվում են Սամաթիայի Սուրբ Գևորգ եկեղեցում։ Նրա խոսքով՝ աշխատանքների մի մասը արդեն ավարտվել է։
1650 թվականին կառուցված Սուրբ Գևորգ եկեղեցին 1915 թվականից հետո անցել էր գանձապետարանի տնօրինությանը և մինչև 1957 թվականը օգտագործվել որպես ախոռ և զինանոց։ 1957 թվականին այն հետ է գնվել Դերիքի հայ համայնքի կողմից։ Համայնքի թվաքանակի նվազման հետևանքով եկեղեցում երկար տարիներ պատարագներ չեն մատուցվել։
Հարցը քննարկելու նպատակով կողմերը սեպտեմբերի 9-ին հանդիպել են Պոլսո Հայոց պատրիարք Սահակ արքեպիսկոպոս Մաշալյանի հետ։ Կողմերը կարևորում են եկեղեցու պատմական ժառանգության պահպանությունն ու ստեղծված իրավիճակի պարզաբանումը։