Թուրքիայում հայերի դեմ իրականացված ցեղասպանություն տերմինն օգտագործելու համար դատապարտված լրագրողներն արդարացվել են

  • by Western Armenia, 03 Հուլիսի, 2024 in Քաղաքականություն
42 դիտում

Թուրքիայում արդարացվել են ընդդիմադիր «bianet» լրատվականի կայքում հրապարակված «Հայերի դեմ իրականացված ցեղասպանության մասին համաշխարհային մամուլի գլխագրերը» խորագրով գրքի ծանոթագրության համահեղինակները։ Այս մասին հայտնում է Ermenihaber-ը։

Լրագրողները մինչև ձերբակալությունը թեմայի շուրջ լուրեր էին հրապարակում և աշխատում «bianet»-ում: Այդ լուրերի պատճառով էլ նրանց նկատմամբ «Թուրք ազգի հասցեին վիրավորանքներ հնչեցնելու» մեղադրանքով քրեական գործ էր հարուցվել:

Լրագրողները 2015-ին, 2018-ին և 2019-ին հրապարակված ընդհանուր առմամբ  6 լուրում օգտագործված բառապաշարի համար էին մեղադրվել:

Նշվում է, որ հուլիսի 2-ին տեղի ունեցած լսումներում, որտեղ և արդարացվել են լրագրողները, նրանցից մեկն ասել է, որ ինքը դատարանում է պարզապես մի գրքի ծանոթագրություն գրելու համար: 

«Մենք այստեղ պաշտպանություն կազմակերպեցինք, մտածելով, թե դատախազը կարող է վիրավորվել Հայերի դեմ իրականացված ցեղասպանություն արտահայտությունից, սակայն գուցե դատավորը ևս շաղկապների հետ կապված խնդիր ունի:

Գուցե նաև մեղք է համարվել իմ «և» շաղկապի օգտագործումը: Իմանալ չենք կարողանում: Բայց որպես արդյունք՝ ոչ շաղկապ օգտագործելս է մեղք, ոչ թարգմանություն անելս, ոչ էլ Հայերի դեմ իրականացված ցեղասպանություն ասելս»,-եզրափակել է նա: