Լիբանանի առողջապահության նախարարության տվյալներով՝ Հարավային Լիբանանի Քֆարրմանի շրջանում իսրայելական օդուժի երկու հարվածների հետևանքով զոհվել է առնվազն 12 մարդ, ևս 13-ը վիրավորվել են։ Զոհերի և վիրավորների թվում եղել են երեխաներ, կանայք և շտապօգնության ծառայության աշխատակիցներ։
Իսրայելական օդուժը հարվածներ է հասցրել Դեյր Զահրանի և Նաբաթիե Ֆաուքա գյուղերի շենքերին։ Հարձակումներից հետո Նաբաթիե Ֆաուքայի ուղղությամբ իրականացվել է նաև ինտենսիվ հրետակոծություն։
Լիբանանի առողջապահության նախարարությունը հայտարարել է, որ շտապօգնության աշխատակիցների և երեխաների թիրախավորումը հակասում է միջազգային մարդասիրական իրավունքի սկզբունքներին և նրանց պաշտպանությանը պատերազմի պայմաններում։
Իրավիճակը Հարավային Լիբանանում շարունակում է մնալ լարված՝ նոր հարձակումների և հրետակոծությունների վտանգով։