Մերձավոր Արևելքում շարունակվող պատերազմում ի հայտ է գալիս նոր ռազմական տեխնոլոգիա։ Տարբեր աղբյուրների համաձայն՝ Իսրայելական ռեժիմի բանակը Իրանի տարածքում սկսել է կիրառել արհեստական բանականությամբ կառավարվող դրոնների մեծ խմբեր, որոնք թիրախավորում են Իրանի անվտանգության ուժերը։
Վերջին հարձակումների ընթացքում դրոնները ճշգրիտ հարվածներ են հասցրել Թեհրանում տեղակայված Բասիջ աշխարհազորայինների անցակետերին։ Այս ուժերը համարվում են Իրանի իշխանությունների հիմնական կառույցներից մեկը, որը ներգրավված է ներքին վերահսկողության և անվտանգության ապահովման մեջ։
Հաղորդվում է, որ նոր համակարգը գործում է «մայրական հարթակ» սկզբունքով․ բարձրության վրա գտնվող օդային սարքը հանդես է գալիս որպես հիմնական կրող և միաժամանակ արձակում է բազմաթիվ փոքր հարձակողական դրոններ։ Դրանք համալրված են արհեստական բանականությամբ, տեսահսկման համակարգերով և մեծ տվյալների բազայով, ինչը թույլ է տալիս հայտնաբերել և թիրախավորել կոնկրետ մարդկանց կամ օբյեկտներ։
Տեխնոլոգիան կարող է նաև կիրառել դեմքերի ճանաչման համակարգ, ինչը հնարավորություն է տալիս իրականացնել շատ ճշգրիտ հարվածներ։ Մասնագետների խոսքով՝ այս մեթոդը թույլ է տալիս իրականացնել լայնածավալ հետախուզություն և արագ հարձակումներ՝ նվազագույն ժամանակում։
Դրոնների գործողություններին աջակցում են նաև տարբեր օդային հարթակներ՝ ռազմական տրանսպորտային ինքնաթիռներ, մեծ անօդաչու թռչող սարքեր և կործանիչներ, որոնք կարող են օդում արձակել փոքր դրոններ՝ հարձակման, հետախուզության կամ էլեկտրոնային պայքարի նպատակներով։
Ռազմական վերլուծաբանները նշում են, որ այս տեխնոլոգիան կարող է փոխել պատերազմի բնույթը տարածաշրջանում՝ դարձնելով այն ավելի տեխնոլոգիական և դժվար կանխատեսելի։
