Իսրայելական բանակը ոչնչացրել է կամուրջ Լիբանանի հարավում և Բեյրութի վրա թռուցիկներ է տարածել՝ նախազգուշացնելով, որ երկիրը կարող է բախվել նույնպիսի ավերածությունների, ինչպիսին եղել են Գազայում։ Այս հայտարարությունները հնչում են այն պահին, երբ Իսրայելական ռեժիմի ռազմական գործողությունները «Հեզբոլլահ»-ի դեմ մտնում են նոր, ավելի ինտենսիվ փուլ։
Ուրբաթ վաղ առավոտյան հարվածի է ենթարկվել Զրարիեհ կամուրջը, որը անցնում է Լիտանի գետի վրայով։ Իսրայելական ռեժիմի բանակը հայտարարել է, որ կամուրջը օգտագործվում էր «Հեզբոլլահ»-ի մարտիկների կողմից երկրի հյուսիսից հարավ տեղաշարժվելու համար, սակայն այդ պնդման վերաբերյալ ապացույցներ չեն ներկայացվել։ Սա առաջին դեպքն է, երբ Իսրայելական ռեժիմը հրապարակայնորեն հաստատում է քաղաքացիական ենթակառուցվածքի թիրախավորումը ներկայիս գործողությունների ընթացքում։
Իսրայելական ռեժիմի պաշտպանության նախարար Israel Katz-ը հայտարարել է, որ նման հարվածները կարող են շարունակվել՝ ընդգծելով, որ Լիբանանի կառավարությունը կբախվի «աճող գների»՝ ենթակառուցվածքների վնասման և տարածքային կորուստների տեսքով, քանի դեռ «Հեզբոլլահ»-ը զինված է։
Ուրբաթ օրը հարվածներ են հասցվել նաև Բեյրութի մի շարք թաղամասերի, որոնք մինչ այժմ չէին թիրախավորվել։ Անօդաչու թռչող սարքը հարվածել է բնակելի շենքի Բուրջ Համուդ շրջանում, իսկ առանձին հարվածներ են հասցվել նաև Ժնահ և Նաբաա թաղամասերին։
Լիբանանի առողջապահության նախարարության տվյալներով՝ մարտի սկզբից ի վեր Իսրայելի հարվածների հետևանքով զոհվել է առնվազն 773 մարդ, վիրավորվել՝ 1933-ը, որոնց թվում կան նաև 103 երեխա։ Ավելի քան 800 հազար մարդ ստիպված է եղել լքել իր տունը։
Բեյրութի վրա տարածված թռուցիկներում նշվում էր, որ Լիբանանը կարող է բախվել նույնպիսի իրավիճակի, ինչպիսին ստեղծվել էր Գազայում։
Տարածաշրջանում լարվածությունը շարունակում է աճել, և միջազգային դիտորդները մտահոգություն են հայտնում, որ հակամարտության հետագա ընդլայնումը կարող է ավելի խորացնել հումանիտար ճգնաժամը Լիբանանում։