Մերձավոր Արևելքում ռազմական գործողությունները չեն դադարում։ Ամերիկայի Միացյալ Նահանգների նախագահ Դոնալդ Թրամփը հայտնվել է Դեմոկրատական կուսակցության ներկայացուցիչների խիստ քննադատության ներքո՝ Իրանի և Լիբանանի դեմ շարունակվող ռազմական գործողությունների ֆոնին։
Ամերիկայի Միացյալ Նահանգների և Իսրայելի զինված ուժերը շարունակել են հարվածներ հասցնել տարբեր թիրախների։ Ռմբակոծվել է Բեյրութի մերձակայքում գտնվող հյուրանոցներից մեկը, ինչպես նաև Ղոմ քաղաքում տեղակայված Փորձագետների ժողովի շենքը։ Նախնական տվյալներով՝ երկու երկրներում զոհերի ընդհանուր թիվը անցել է 800-ը։
Միաժամանակ, Իրանը չորրորդ գիշերն անընդմեջ պատասխան հարվածներ է հասցնում Իսրայելի և ամերիկյան օբյեկտներին տարածաշրջանում։ Հարվածների մասին տեղեկություններ են ստացվել նաև Արաբական Միացյալ Էմիրությունների Դուբայ քաղաքում գտնվող ամերիկյան հյուպատոսության և Ֆուջեյրա նավահանգստի ուղղությամբ։
Տարածաշրջանում իրավիճակը շարունակում է մնալ ծայրահեղ լարված, իսկ միջազգային հանրությունը կոչ է անում անհապաղ դադարեցնել ռազմական գործողությունները և վերադառնալ բանակցային գործընթացին։